Քիչ առաջ ԶԼՄ–ներում տեղեկություններ տարածվեցին, որ Երևանի փոխքաղաքապետ Կամո Արեյանը լրագրողների հետ հանդիպման ժամանակ հաստատել է Երևանի քաղաքապետ Կարեն Կարապետյանի՝ այլ աշխատանքի անցնելու մասին լուրերը՝ նշելով անգամ, որ հայտնի է նոր աշխատանքի աշխատավարձի չափը։

«7օր»–ի հետ զրույցում, սակայն, Կամո Արեյանը հերքել է այս տեղեկությունը՝ պնդելով, որ դա բացարձակ ապատեղեկատվություն է։

–Ստորության աստիճանի կեղծիք է։ Ես այսօր ոչ մի տեղ լրագրողի երես չեմ տեսել, ինձ ոչ մի լրագրող չի մոտեցել,–ավելացրել է Կ. Արեյանը։

Նա նաև նշել է, որ Կարեն Կարապետյանի հրաժարականի մասին որևէ պարզաբանում չի կարող տալ, քանի որ ոչ մի հավաստի տեղեկություն չունի։

Ի դեպ, ասյօր Երևանի քաղաքապետ Կարեն Կարապետյանը շարունակել է կատարել ի պաշտոնե իր պարտականությունները։ Մասնավորապես նա հանդիպել է Մոնրեալի քաղաքապետ Ժերալդ Թրեմբլեյի հետ, ով Երևան է ժամանել Ֆրանկոֆոն քաղաքապետերի միջազգային ասոցիացիայի 31-րդ գլխավոր վեհաժողովին մասնակցելու նպատակով:

7or.am