Այսօր հրավիրված ասուլիսում Հայաստանի ագրարագյուղացիական միավորման նախագահ Հրաչ Բերբերյանը նշել է, թե մասնագետի գնահատմամբ`  բնակլիմայական պայմաններն այս տարի գյուղատնտեսության համար  ընդհանուր առմամբ բարենպաստ էին, սակայն ներկայացվող թվերն ուռճացված են։

–Ուռճացված են ցորենի, ծիրանի բերքի ցուցանիշները: Թվեր են նկարում։ Ինչպե՞ս կարող է կաթնատվությունը բարձրանալ, երբ գլխաքանակի նվազում կա,–ասել է նա։

Ըստ Հարչ Բերբերյանի` այս տարի կունենանք նույնքան կարտոֆիլ, որքան անցած  տարի։

–Թերևս մի փոքր ավելին լինի, սակայն դա չի ազդի գնի վրա, իսկ գարնանը կարտոֆիլը կթանկանա և ամռանը կլինի 300–400 դրամ,–ասել է նա:

Հրաչ  Բերբերյանի խոսքով՝ նախկինում պարարտանյութերի գները ֆիքսված էին, և հայտարարվել էր, թե ազատում են ԱԱՀ-ից, և 20%-ով էժանացում էին խոստանում, սակայն այդ հարկատեսակը միշտ էլ չէր գործում, իսկ հիմա 30% գնաճ եղավ։

–Որոշ պետական այրեր այդ բիզնեսն իրենց ձեռքը վերցրեցին: Մանրածախ ներկրողները հրաժարվեցին ներկրել, և այսօր ունենք արհեստական դեֆիցիտ պարարտանյութերի շուկայում: Պետությունը խառնվեց բիզնեսին, տեսանք՝ ինչ եղավ: Արջի ծառայություններ պետք չէ մատուցել,-ասել է բանախոսը: