«Երևանյան հեռանկարներ» 12-րդ երաժշտական միջազգային փառատոնը և Հայաստանի պետական ֆիլհարմոնիկ նվագախումբը հոկտեմբերի 21-ին հանդես եկան համատեղ մամլո ասուլիսով: Ներկայացվեց Փառատոնի շրջանակներում հոկտեմբերի 26-ին Արամ Խաչատրյան համերգասրահում կայանալիք աննախադեպ երաժշտական իրադարձությունը` լեգենդար ջութակահար, “Գրեմմի”-ի կրկնակի մրցանակակիր Պինկաս Ցուկերմանի համերգը Հայաստանի պետական ֆիլհարմոնիկ նվագախմբի հետ:

Չորս տասնամյակ շարունակ համարվելով համաշխարհային երաժշտության ֆենոմենը` Պինկաս Ցուկերմանը հավասարապես հարգի է որպես ջութակահար, ալտահար, դիրիժոր, ուսուցիչ և կամերային երաժիշտ։ Տարեկան հանդես գալով շուրջ 150 համերգներով աշխարհի ամենահեղինակավոր սրահներում` Ցուկերմանը դասվում է դարի ջութակահարների ամենաբարձր կարգին: Ելույթ ունենալով աշխարհի լավագույն նվագախմբերի հետ` 2009թ֊. հանդիսանում է Լոնդոնի արքունական ֆիլհարմոնիկ նվագախմբի գլխավոր հրավիրյալ դիրիժորը։  Ստեղծագործական 45 տարիների ընթացքում վիրտուոզ երաժիշտն արժանացել է միջազգային ամենահեղինակավոր մրցանակներին: Ընդգծենք, որ նրա 100֊-ից ավելի ձայնագրություններից 21-ը նոմինացվել, իսկ երկուսը` արժանացել են «Գրեմմի» մրցանակի։ Նշենք, որ Ցուկերմանը վարել է Կեննեդի Կենտրոնի Honors և Grammy Awards մրցանակաբաշխությունները։ Ցուկերմանի նվագը հնչում է հոլիվուդյան բազմաթիվ հայտնի ֆիլմերում։