Հայաստանի Հանրապետությունում այսօր շուրջ 114.000 ուսանող սովորում է բարձրագույն ուսումնական հասատատություններում, գրեթե 31.000-ը` միջին մասնագիտական կրթական ծրագիր իրականացնող ուսումնական հաստատություններում: Հետազոտությունները փաստում են, որ աշակերտների շրջանում մասնագիտական կողմնորոշման աշխատանքներ հիմնականում չեն իրականացվում: ՀՀ Աշխատանքի և սոցիալական հարցերի նախարարության Երիտասարդների մասնագիտական կողմոնորոշման կենտրոնի ՊՈԱԿ-ի տնօրեն Հայկուհի Գևորգյանը նկատում է, որ դեռահասները մասնագիտությունն ընտրում են անկախ իրենց նախասիրություններից և աշխատաշուկայի պահանջարկից, հաճախ էլ պարզապես ընդառաջելով ծնողների ցանկություններին:

Բրիտանական խորհրդի «Հմտություններն աշխատանքում» ծրագրի շրջանակում ՀՀ աշխատանքի և սոցիալական հարցերի նախարարության հետ համատեղ մշակվել է «Կարիերան ավելին է, քան զուտ աշխատանք» ձեռնարկը, որի նպատակն է ներկայացնել մասնագիտական կողմնորոշման համակարգի մասնագետների գործունեության հնարավորությունները երիտասարդներին ապագա մասնագիտության ընտրության ուղղորդման հարցում:  Ձեռնարկի հեղինակը Երիտասարդների մասնագիտական կողմոնորոշման կենտրոնի ՊՈԱԿ-ի տնօրեն Հայկուհի Գևորգյանն է:

Ձեռնարկում ներկայացված է համակարգի տեսությունն ու Հայաստանում գործարկման հնարավորությունները, Միացյալ Թագավորության փորձն այս ոլորտում ու ծառայությունների նկարագիրը: Մասնագիտական կողմնորոշումը Միացյալ Թագավորության կրթական ոլորտի անբաժանելի բաղկացուցիչն է: 2010 թվականին ՄԹ-ի նորընտիր կառավարությունն իր գործունեության առաջին օրերին բարձրաձայնեց մասնագիտական կողմնորոշման կարևորության մասին: Մեծ Բրիտանիայում բազմաթիվ գործակալություններ տրամադրում են տեղեկատվություն, խորհրդատվություն և կողմնորոշման հնարավորություն երիտասարդներին և չափահասներին:

«Հմտություններն աշխատանքում» ծրագրի շրջանակում Բրիտանական խորհուրդն իրականացրել է մասնագիտական կողմնորոշման ոլորտի մասնագետների վերապատրաստում, աշխատաժողովներ և սեմինարներ:  «Կարիերան ավելին է, քան զուտ աշխատանք» ձեռնարկը կտրամադրվի շահագրգիռ կառույցներին ու կազմակերպություններին: Ձեռնարկը հնարավոր է ներբեռնել Բրիտանական խորհրդի կայքից: (http://www.britishcouncil.org/hy/armenia-british-council-news-and-events-publications.htm)