Էսի Ազգային ժողով չի, էսի բիսեդկա ա: Այս մասին, այսօր՝ մայիսի 24-ին, ԱԺ-ում լրագրողների հետ զրույցում նշեց «Հայաստան» խմբակցության պատգամավոր Իշխան Սաղաթելյանը՝ անդրադառնալով ԱԺ դահլիճում տեղի ունեցած միջադեպին, որից հետո ԱԺ նախագահ Ալեն Սիմոնյանի հրահանգով դահլիճից դուրս բերեցին ընդդիմադիր պատգամավոր Արթուր Սարգսյանին:

«Պատգամավորի ելույթից հետո ՔՊ-ական խուժաններից մեկն ասում է՝ «Վեր ընկի տեղդ»: Էս էն սրանք, խուժան են: Դուխից են խոսում, չգիտեմ ինչից են խոսում, բերել զորքը կանգնացրել են. իրենք խոսում են՝ զորքին ասում են մտեք ներս»,-ասաց նա՝ հավելելով, որ ամեն ինչ լավ է լինելու:

Նշենք, որ ամեն ինչ լարվեց «Հայաստան» խմբակցությունից Արթուր Սարգսյանի ելույթից հետո, երբ նա դիմելով դատավորի թեկնածու Արմեն Դանիելյանին ասաց, որ 2021թ նոյեմբերի 15-ին իր լսելու իրավունքը խախտելով, կալանավորել է իրեն, ինքն այդ ժամանակ գտնվել է ԱԺ-ում: «Ես ասում եմ, որ դուք ապօրինի որոշումներ եք կայացրել: Ապօրինի որոշում եք կայացրել և կալանավորել եք ինձ: Դուք իմ լսելու իրավունքը չեք ապահովել, որովհետև տղամարդկություն չեք ունեցել նայել իմ աչքերի մեջ և կալանավորել»,-հավելել էր նա:

Այս ձևակերպմանն ի պատասխան՝ ԱԺ նախագահ Ալեն Սիմոնյանը հորդորել է կոռեկտ արտահայտվել: Դուրս գալուց առաջ, նա կանգնեց ամբիոնի կողքին՝ Արմեն Դանիելյանին հորդորելով նայել իր աչքերի մեջ, ինչից հետո լարվել է իրավիճակը:

ԱԺ նախագահը ներս հրավիրեց անվտանգության աշխատակիցներին՝ հորդորելով Արթուր Սարգսյանին դուրս տանել դահլիճից:

Երբ անվտանգության աշխատակիցները ուժով դուրս էին տանում պատգամավորին, վերջինս բղավեց. «Արա, թողեք հլը, դու պատասխան ես տալու: Հլը սրան նայի, այ բիձա: Ես պտի մտնեմ ներս, ինձ չպիտի հանեք: Ինձ ասում է՝ հլը ռադ էղի ստեղից, այ բիձա: Անպատասխան թողել եք, դրա համար սենց ա անում»:

«Հայաստան» խմբակցությունից Արթուր Խաչատրյանն էլ հավելեց. «Էս ամեն ինչը Հովիկ Աղազարյանի սադրանքն էր, հենց իր անդաստիարակությունն էր, բոլոր իշխանություններին քծնելու ցանկությունն էր»:

Արդեն նիստերի դահլիճից դուրս թեթև քաշքշուկ սկսվեց նաև «Հայաստան» խմբակցության պատգամավոր Իշխան Սաղաթելյանի և անվտանգության աշխատակիցների միջև: Մյուս պատգամավորները փորձում էին բաժանել ու պատնեշ ստեղծել նրանց միջև: