Թուրքիայի Ադանա քաղաքում ջրհեղեղ է, հորդառատ անձրևի ու կարկուտի պատճառով հեղեղվել են փողոցները։ Համացանցում տարածված տեսանյութերում տեսանելի է, թե ինչպես է ջուրը քշում անգամ ավտոմեքենաները։

«Փաստինֆո»-ն հայտնել էր, որ Թուրքիայում փետրվարին տեղի ունեցած ավերիչ երկրաշարժից տուժած Քահրամանմարաշ նահանգում երեկ փոթորիկ է տեղի ունեցել։

Այն ոչ միայն շենքերի տանիքներ է պոկել, այլև՝ ավտոբուսներ շրջել, էլեկտրահաղորդման գծեր կտրել։ Ավերվել էր նաեւ երկրաշարժից տուժածների համար պատրաստված վրանային ճամբարը։ Ուժգին քամուց շրջվել է ավելի քան 170 վրան։

Տեղական լրատվամիջոցների հաղորդմամբ՝ փոթորկի հետևանքով առնվազն երկու հոգի մահացել է, 40-ը՝ տուժել։

Իսկ դրան նախօրեին էլ արտասովոր երեւույթ էր գրանցվել Ստամբուլում՝ ընկղմվելով խավարի մեջ։

«Հորդառատ անձրևը, որը սկսվել է պիկ ժամին, լրջորեն ազդել է ճանապարհային իրադրության վրա։ Սպասելով հորդառատ անձրևի ավարտին՝ խցանումների մեջ կանգնած Ստամբուլի բնակիչները ականատես են եղել հազվագյուտ բնական երևույթի։ Ամպը հինգ րոպե ծածկել էր արևը: Երբ հանկարծ մթնեց, շատերը սկսեցին խուճապի մատնվել»,-ասվում է հաղորդագրության մեջ։