Ըստ լրատվամիջոցների՝ վերջերս ԱՄՆ Հայ Դատի հանձնախմբի ատենապետ Քեն Խաչիկյանը Հայ Դատի վաշինգտոնյան գրասենյակի մամուլի խոսնակ Էլիզաբեթ Չուլջյանի ուղեկցությամբ այցելել է Վրաստան՝ երկրի բարձրաստիճան պաշտոնյաների և հայ համայնքի ներկայացուցիչների հետ քննարկելով Թբիլիսիի և Ջավախքի հայության համայնքային, սոցիալ-տնտեսական, հոգևոր և մշակութային կյանքին վերաբերող հարցեր:

Պրն Խաչիկյանը, ամփոփելով շրջագայության արդյունքները, հայտարարել է, որ Հայ Դատի հանձնախումբը հետամուտ է լինելու Ջավախքի ամրապնդմանն ու անվտանգությանը: Նա նաև նշել է, որ «Ջավախքում մենք կանգնած ենք լուրջ մարտահրավերների առջև, որոնք, աշխատելով միասնաբար, կարող ենք հաղթահարել» (տե՛ս՝ http://asbarez.com/98280/trust-and-mutual-respect-vital-to-strengthening-armenia-diaspora-relations-says-hachikian ):

Ջավախքահայության իրավունքների պաշտպանության համակարգող խորհուրդը ողջունում է ԱՄՆ Հայ Դատի հանձնախմբի նախագահի այս հայտարարությունը: Մեր կառույցը դեռևս 2010թ. հոկտեմբերի 13-ին կոչ էր արել ԱՄՆ-ում գործող հայկական լոբբիստական կազմակերպություններին ավելի մեծ ուշադրություն դարձնել վրաց իշխանությունների կողմից ջավախքահայության իրավունքների ոտնահարման խնդրին (տե՛ս՝ http://yerkir.org/index.php?level_id=280&lang=arm ), և այսօր մենք ուրախ ենք այդ ուղղությամբ Հայ Դատի հանձնախմբի գործադրվող ջանքերին:

Լիահույս ենք, որ ԱՄՆ Հայ Դատի հանձնախումբը ձեռնամուխ է լինելու այլ գործնական քայլերի՝ ուղղված ջավախքահայության խնդիրների լուծմանը:  Մենք պատրաստ ենք ցույց տալ Հայ Դատի հանձնախմբին, ինչպես նաև ԱՄՆ-ում գործող հայկական այլ լոբբիստական կազմակերպություններին, բոլոր հնարավոր աջակցությունը Թբիլիսիի և Ջավախքի հայության առջև ծառացած հիմնախնդիրների լուծմանը հասնելու գործում: Այդ խնդիրներն են.

-         Ջավախքահայության քաղաքական և քաղաքացիական իրավունքների ոտնահարման քաղաքականության վերացումը, ջավախքահայ քաղաքական ակտիվիստների նկատմամբ քաղաքական հալածանքների դադարեցումը, Վահագն Չախալյանի ազատ արձակումը,

-         Ինքնակառավարման մարմինների լիազորությունների ընդլայնումը և ինքնակառավարման մակարդակի բարձրացումը,

-         Վրաստանի հայաբնակ շրջաններում (Սամցխե-Ջավախք-Ծալկա) հայոց լեզվին տարածաշրջանային պաշտոնական լեզվի կարգավիճակի շնորհումը,

-         Հայ Առաքելական եկեղեցու գրանցումը, խորհրդային իշխանության տարիներին բռնագրավված եկեղեցական կառույցների վերադարձը,

-         Ջավախքահայության արտագաղթի կանխումը և կրթա-մշակութային զարգացման հնարավորությունների ստեղծումը, այդ նպատակով Ախալքալաքում հայ-վրացական համալսարանի հիմնադրումը:

Ջավախքահայության իրավունքների պաշտպանության համակարգող խորհուրդ

Ախալքալաք-Երևան