Բելառուսի Ազգային իրավական ինտերնետային հարթակում հրապարակվել են «Բելառուսի Հանրապետության քաղաքացիության մասին» օրենքում փոփոխությունները, որոնք թույլ են տալիս քաղաքացիությունից զրկել ծայրահեղական գործունեությանը մասնակցելու և պետության շահերին զգալի վնաս պատճառելու համար: Այս մասին հաղորդում է «Արմենպրես»-ը:

Փոփոխություններն ուժի մեջ կմտնեն պաշտոնական հրապարակումից վեց ամիս անց։ Օրենքն ընդունվել է հունվարի 5-ին: Օրենքի համաձայն՝ 18 տարին լրացած անձը կարող է զրկվել Բելառուսի քաղաքացիությունից, եթե առկա լինի դատարանի՝ օրինական ուժ ստացած դատավճիռ (բելառուսական կամ արտասահմանյան), որը «հաստատում է այդ անձի մասնակցությունը ծայրահեղական գործունեությանը կամ նրա կողմից Բելառուսի Հանրապետության շահերին զգալի վնաս պատճառելը»:

Քաղաքացիությունից կարող են զրկվել նաև Բելառուսի սահմաններից դուրս գտնվող անձինք։ Քաղաքացիությունից կզրկվեն նաև այն անձինք, որոնք օտարերկրյա պետությունում անցել են զինվորական ծառայության, ոստիկանությունում, անվտանգության, արդարադատության կամ այլ պետական ​​մարմիններում ծառայության։

Ըստ օրենքում փոփոխությունների՝ Բելառուսի քաղաքացիություն ձեռք բերող անձինք պարտավոր են երդում տալ: Երդումից հրաժարվելը հիմք կհանդիսանա համապատասխան որոշումը չեղարկելու համար։

Փաստաթուղթը նաև Բելառուսի քաղաքացիներին պարտավորեցնում է տեղեկացնել իրավասու մարմիններին օտարերկրյա պետության քաղաքացիության, օտարերկրյա պետությունում կեցության իրավունքի կամ այլ փաստաթղթի առկայության մասին, որն իրավունք է տալիս արտոնություններ և առավելություններ ստանալ տվյալ պետությունում: Տեղեկատվությունը պետք է տրամադրվի «համապատասխան փաստաթղթերը ստանալու օրվանից հետո երեք ամսվա ընթացքում»: