ԱՄՆ-ի ազգային ավիատիեզերական գործակալությունը՝ ՆԱՍԱ-ն, նոյեմբերի 16-ի առավոտյան «Օրիոն» տիեզերանավով դեպի Լուսին է արձակել պատմության մեջ ամենահզոր գերծանր SLS (Space Launch System) հրթիռակիրը:

Այն արձակվել է Ֆլորիդայի Քենեդու անվան տիեզերական կենտրոնից: Նախկինում մեկնարկը 2 անգամ հետաձգվել էր տեխնիկական խնդիրների պատճառով, գրում է Daily Mail-ը։

4 մլրդ դոլար արժողությամբ SLS-ի և «Օրիոն»-ի արձակումը «Արտեմիս 1» (Artemis-1) առաքելության մի մասն է: Տիեզերանավը պետք է փորձնական անօդաչու ռեժիմով թռնի դեպի Լուսին, 25 օր անցկացնի դրա ուղեծրում, ապա վերադառնա Երկիր: 2024 թվականին պետք է իրականացվի «Արտեմիս 2» առաքելությունը, որի ընթացքում չորս տիեզերագնացներ կթռնեն Լուսնի շուրջը։ «Արտեմիս-3» առաքելությունը նախատեսված է 2025 թվականին, որի ընթացքում տիեզերագնացները պետք է վայրէջք կատարեն Լուսնի մակերեսին։