Սեպտեմբերի 12-ին Բելառուսի արտգործնախարար Սերգեյ Մարտինովի հրավերով  ԱԳ նախարար Էդվարդ Նալբանդյանը պաշտոնական այցով ժամանեց Մինսկ:

Նույն օրը Էդվարդ Նալբանդյանին ընդունեց Բելառուսի Հանրապետության նախագահ Ալեքսանդր Լուկաշենկոն:

Ողջունելով Էդվարդ Նալբանդյանին` Ալեքսանդր Լուկաշենկոն նշեց,  որ երկու երկրների ղեկավարների ջանքերի շնորհիվ վերջին տարիներին հայ-բելառուսական հարաբերություններն աննախադեպ զարգացում են ապրել համագործակցության բոլոր բնագավառներում: Նախագահ Լուկաշենկոն ընգծեց, որ  առկա են բոլոր նախադրյալները երկկողմ հարաբերությունների առավել ամրապնդման համար եւ վստահություն հայտնեց, որ կողմերը հավելյալ ջանքեր կգործադրեն այդ ուղղությամբ:

Նախարար Նալբանդյանը, Ալեքսանդր Լուկաշենկոյին փոխանցելով նախագահ Սերժ Սարգսյանի ողջույններն ու բարեմաղթանքներն, իր հերթին եւս  գոհունակություն հայտնեց երկկողմ հարաբերությունների բարձր մակարդակի եւ դինամիկ զարգացող համագործակցության առնչությամբ:

Երկուստեք շեշտվեց, որ բարձր մակարդակի քաղաքական երկխոսությունը, փոխայցելությունները, տնտեսական փոխգործակցությունը, խորհրդարանական կապերը, ապակենտրոնացված համագործակցությունը, մշակութային փոխանակումները հնարավորություն են տալիս առավել խորացնել երկու ժողովուրդների միջեւ բարեկամությունը:

Նախագահ Լուկաշենկոն եւ նախարար Նալբանդյանն անդրադարձան Հայաստանի եւ Բելառուսի համագործակցության զարգացման եւ խորացմանն առնչվող տարբեր հարցերի:

Նախագահ Լուկաշենկոն խնդրեց իր ջերմ ողջույնները փոխանցել  ՀՀ նախագահ Սերժ Սարգսյանին:

Հայաստանի արտգործնախարար Էդվարդ Նալբանդյանի հաջորդ հանդիպումն իր բելառուս գործընկեր Սերգեյ Մարտինովի հետ էր, որի ընթացքում  քննարկվեցին երկկողմ, տարածաշրջանային եւ միջազգային հարցերի լայն շրջանակ:

Հայաստանի եւ Բելառուսի արտգործնախարարները քննարկեցին երկու երկրների ղեկավարների միջեւ  ձեռք բերված պայմանավորվածությունների եւ նրանց կողմից տրված հանձնարարականների կատարման ընթացքը:

Զրուցակիցներն անդրադարձան բարձր մակարդակով առաջիկա շփումների ժամանակացույցին:

Երկուստեք նշվեց  լայն իրավապայմանագրային դաշտի առկայությունը եւ միաժամանակ շեշտվեց այն առավել ընդարձակելու անհրաժեշտությունը` փոխգործակցության հետագա խորացումն ապահովելու համար:

Էդվարդ Նալբանդյանն ու Սերգեյ Մարտինովն անդրադարձան երկկողմ առեւտրատնտեսական փոխգործակցությանը, դրա դիվերսիֆիկացման հնարավորություններին, տնտեսական համագործակցության միջկառավարական հանձնաժողովի աշխատանքներին:

Հայաստանի եւ Բելառուսի արտգործնախարարները քննարկեցին նաեւ մշակութային փոխանակումների առավել ակտիվացման նպատակով ձեռնարկվելիք քայլերը:

Սերգեյ Մարտինովի խնդրանքով Էդվարդ Նալբանդյանը ներկայացրեց արցախյան հիմնախնդրի կարգավորմանն ուղղված բանակցությունների վերջին զարգացումները:

Հանդիպումից հետո Հայաստանի եւ Բելառուսի արտաքին գործերի նախարարները ստորագրեցին երկու երկրների արտաքին քաղաքական գերատեսչությունների միջեւ 2011-2012 թթ. խորհրդակցությունների ծրագիրը:

Ստորագրման արարողությանը հետեւեց  Հայաստանի եւ Բելառուսի արտգործնախարարների ճեպազրույցը լրագրողների հետ:

Էդվարդ Նալբանդյանն այցելեց նաեւ Մինսկի Հաղթանակի հրապարակ: Պատվո պահակախմբի ստուգայցից եւ զինվորական նվագախմբի կողմից Հայաստանի եւ Բելառուսի օրհներգների կատարումից հետո, նախարար Նալբանդյանը ծաղկեպսակ դրեց Մեծ Հայրենական պատերազմում Հաղթանակի հուշարձանին: