«Պատկերացրեք՝ Նիկոլ Փաշինյանը բանակցություններն ինչպես է վարում, եթե ԱԺ-ում հայտարարում է, որ եթե թուղթ լինի, կստորագրի, ինչը համաժողովրդական զայրույթի ալիք բարձրացրեց, իսկ երեկոյան ուղիղ եթերով ասաց՝ ես դա նկատի չեմ ունեցել: Նա խոսում է մի բան, դրանից հետո այդ բանակցողի հետ հո լայվով կամ հեռախոսով չի՞ խոսի ու ասի՝ դա նկատի չեմ ունեցել: Այդպես, նկատի չունենալու բառակույտերով տապալեց բանակցային պրոցեսը, փչացրեց հարաբերությունները ռազմավարական դաշնակցի հետ, հարևանների հետ ու այսօր արդեն օդից ընկած, առավոտից գիշեր հեռախոսազանգերով ու խնդրագրերով է հանդես գալիս»,-168TV-ի «Ռեվյու» հաղորդման ընթացքում ասաց ԱԺ «Հայաստան» խմբակցության պատգամավոր Գեղամ Մանուկյանը:

Գեղամ Մանուկյանը շեշտեց՝ գործող իշխանություններն այս օրերի համար էլ են պատասխան տալու.

«Այս օրերի համար սրանք էլի պատասխան են տալու: Քոչարյան Անդոն մի անգամ Դավիթ Տոնոյանի համար էր, չէ՞, ասում՝ ձկնորսի համազգեստ հագած, հիմա աչքովս ընկնում են իշխանական պատգամավորներ, որոնք այդպես որսորդական շորեր հագած՝ այստեղ-այնտեղ են լինում: Նույն հանցավոր ապատեղեկատվության մասին էին երեկ ճոռոմ-ճոռոմ խոսում ԱԺ-ում, կամ այսօր կառավարության նիստում. Ո՞վ է ապատեղեկատվություն տարածողը՝ կեղծ դիմակավոր նինձանե՞րը, որոնք իբր առաջնագծից էին տեսանյութ հրապարակել, այդ թատրոններ բեմադրողնե՞րը»:

«Նրանք հասկանում են, որ պատասխանատվություն ունեն, որ հասարակությունն այլևս պայթելու է: Նույն երեկ ԱԺ-ում իմ ելույթի ժամանակ, հակառակ այդ բոլոր բղավոցներին, ինձ որևէ մեկն այդպես հանդարտ չէր տեսել: Ես մեր խմբակցության անունից էի ելույթ ունենում և հասկանում էի, որ նրանց պետք է խոսք փոխանցեմ, այդ մարդիկ պետք է հասկանան՝ Նիկոլ Փաշինյանն ասում է՝ եթե ինչ-որ թուղթ լինի՝ ստորագրեմ, թեկուզ՝ ինձ կոչեն դավաճան, միայն Նիկոլին չեն կոչելու դավաճան, այդ բոլոր նստածներին են կոչելու դավաճան: Այսինքն՝ ԱԺ քաղաքական մեծամասնությունը պետք է հասկանա՝ Նիկոլ Փաշինյանը հետո հո չի՞ մտածելու 71 պատգամավորի մասին, տարբեր մակարդակներում նստած պաշտոնյաների մասին, իր անվտանգությունն ապահովող այդ հարյուրավոր զինվորականների, ոստիկանների, ԱԱԾ-ի աշխատակիցների, քննչական մարմինների աշխատողների մասին: Փաշինյանը սեփական փրկության մասին է մտածելու, դրա համար ժամանակը սարսափելի քիչ է»:

Գեղամ Մանուկյանը շեշտեց՝ գործող իշխանություններին պետք է հեռացնել. «Սրանց պետք է քացով դուրս հանել իրենց կաբինետներից. Կոպիտ է հնչում, բայց այլ բառ չունեմ: Բաղրամյանում նստած Գրիգորյան Արմենին պետք է պատուհանից դուրս նետել, որովհետև նրա քաղհասարակության քաղաքականության հետևանքն այսօրվա հարյուրից ավելի զոհերն են, այն 4000 զոհերն են:

Իրենց այդ ամբողջ մոլագար քաղաքականության հետևանքն ինչ-որ շենքի փլուզում կամ տնտեսական ցուցանիշի անկում չէ, զոհն է, մարդկային զոհեր, հազարներ: Երբ խելագարները Յուրի Խաչատուրով էին հանում ՀԱՊԿ-ից ու կալանավորում, այդ խելագարության հետևանքը զոհն է, մարդն է: Այսօր այս քաղհասարակության արևմտամետ դեմքերն առավոտից գիշեր գրում են՝ ՀԱՊԿ ու ՀԱՊԿ, թող հիշեն՝ 2018թ. Յուրի Խաչատուրովին հանելը, դրա պատճառով էր: Բոլորի վզին է: Խառատյանարսենների վզին է: Թող չմտածեն, որ իրենք սպիտակ թևերով են դուրս գալու այս ամենից: Բոլորի վզին է, բոլորի ձեռքերն արյան մեջ են: Գրիգորյան Արմենը, որը, ուղղակի ողբերգություն է՝ մարդը հարսանիքը Շուշիում անելով՝ Շուշի կորցնող արցախցին է, բայց ձեռքերն արյան մեջ են, որովհետև իր հակառուսականությունը, իր հակա-ՀԱՊԿ-ությունը, խառատյանարսենների ու բոլորի, բոլորը բերեցին այս զոհերին հասցրեցին, հիմա ասում են՝ ՀԱՊԿ-ը ուր է: Խելագարվում ես:

Ես Արմեն Գրիգորյանի տեղը գետինն եմ մտնում: Ամեն օր գետինն եմ մտնում: Նայում ես Գրիգորյան Արմենին՝ կարծես ոչ մի բան չի եղել, մի վայրկյան իր պատճառով ավեր չի եղել: Նիկոլի մասին էլ չեմ խոսում, կորսված մարդ է»:

Գեղամ Մանուկյանը հավելեց. «Երեկ ԱԺ-ում կարողացա ինձ զսպել, այսօր՝ ոչ»: