ՀՀ կրթության և գիտության նախարարությունում այսօր  տեղի է ունեցել ՀՀ կրթության և գիտության նախարար Արմեն Աշոտյանի և Լիտվայի  կրթության և գիտության նախարար Գինտարաս Ստեպոնավիչիուսի համատեղ մամուլի ասուլիսը: ՀՀ կրթության և գիտության նախարարը նշել է, որ   երկկողմ բանակցությունների ընթացքում քննարկվել են Հայաստանի և Լիտվայի  կրթության ոլորտների բարոփոխումների ընթացքն ու դրանց արդյունքները, ինչպես նաև երկու երկրների միջև փորձի փոխանակման հնարավորությունները։ Ընդգծելով, որ Լիտվայում կրթական բարեփոխումների արդյունքները բավականին տպավորիչ են, ՀՀ կրթության և գիտության նախարարը մասնավորապես նշել է. «Լիտվայի փորձը մեզ համար շատ  օգտակար և հետաքրքիր է, որովհետև այդ երկրին հաջողվել է խորհրդային պետության կրթական համակարգի ինստիտուցիոնալ և բովանդակային բարեփոխումների արդյունքում համապատասխանել Եվրամիության  կրթական չափանիշերին»: Առաջիկայում Լիտվայի կրթական համակարգի փորձն ուսումնասիրելու նպատակով Հայաստանից մասնագետներ կմեկնեն Լիտվա՝ տեղում ծանոթանալու նրանց աշխատանքներին։ Նախատեսվում է նաև հայ-լիտվական պայմանագրի կնքում` կրթության և գիտության ոլորտում համագործակցության վերաբերյալ։ Նախարարները պայմանավորվել են նաև երկու նախարարությունների կողմից ջանքեր գործադրել՝ միջբուհական կապերն ամրապնդելու ուղղությամբ։ Լիտվայի  կրթության և գիտության նախարար Գինտարաս Ստեպոնավիչիուսը նշել է, որ առաջին անգամ է այցելում  Հայաստան, և տպավորված է մեր երկրով։ Անդրադառնալով Հայաստանի հետ կրթական համագործակցության խնդիրներին` Գինտարաս Ստեպոնավիչիուսն ընդգծել է Հայաստանի և Լեհաստանի Բոլոնյան գործընթացի համանախագահության շրջանակում Երևանում ընթացող միջազգային համաժողովի կարևորությունը , որը վերաներում է կրթության ֆինանսավորման հիմնախնդիրներին։  Լիտվայի կրթության և գիտության նախարարը հայ գործընկերոջ հետ քննարկումներից առանձնացրել է մասնավորապես բարձրագույն ուսումնական հաստատությունների միջև կապերի հաստատման , ուսանողների փոխանակաման, համատեղ կրթական ծրագրերի իրականացման անհրաժեշտությունը, նշելով, որ երկուստեք փոխանակման արժանի փորձ կա: Երկու երկրների  կրթական գերատեսչությունների ղեկավարները պատասխանել են  նաև լրագրողների հարցերին, որոնք վերաբերել են Հայաստանի և Լիտվայի կրթական համակարգի խնդիրներին։