Այսօր հրավիրված ասուլիսում Հելսինկյան կոմիտեի նախագահ Ավետիք Իշխանյանը սահմռկեցուցիչ է անվանել բանակում խելագարության հասցված զինվոր Հովհաննես Վարդանյանի դեպքը։

–Զինվորը հոգեբուժարանում է, իսկ պաշտպանության նախարարության կողմից ոչ մի արձագանք։ Սա սարսափելի է։ Փաստորեն, այսքան ժամանակ ծածկադմփոց է եղել,-ասել է Ավ. Իշխանյանը։

Ըստ նրա՝ Զինված ուժերում նման դեպքերը անպատժելիության մթնոլորտի հետևանք են։

Սախարովի անվան մարդու իրավունքների պաշտպանության հայկական կենտրոնի իրավաբան Մերի Խաչատրյանի խոսքերով էլ հայկական բանակը բարոյահոգաբանական ճգնաժամի մեջ է, իսկ ՊՆ-ն գաղտնիության պայմաններում է աշխատում։

«Լրագրողները հանուն մարդու իրավունքների» հկ ղեկավար Ժաննա Ալեքսանյանն էլ ընդգծել է, որ սպանությունների փաստով բոլոր գործերը դատարան են հասնում ինքնասպանության հասցնելու մասին հոդվածով, և դա պատասխանատվությունից խուսափելու մի ձև է։

–Նման կերպ ՊՆ–ն որդիների սպանության փաստն ամբողջությամբ դնում է ծնողների վրա՝ այս կերպ խուսափելով նաև զոհվածների ընտանիքներին արժանի փոխհատուցում տրամադրելուց,–ասել է Ժ. Ալեքսանյանը:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը ներկայացրել է թվեր՝ համաձայն որոնց 2005-2011թթ. այս տարվա սեպտեմբերի 1-ի դրությամբ հայկական բանակում արձանագրվել է 306 մահվան դեպք, 2007-2011թթ.՝ 228 մահվան դեպք, որոնցից միայն 32-ն է եղել հրադադարի ռեժիմի խախտման հետևանքով, հետևաբար, ստացվում է, որ բանակում մահացությունների միայն տաս տոկոսն է կապված զինադադարի ռեժիմի խախտման հետ, և բանակում ծառայելն ավելի վտանգավոր է, քան դիրքերում գտնվելը։

Իրավապաշտպանները պաշտպանության նախարարից պարզաբանում են պահանջում ստեղծված իրավիճակի և բանակում արձանագրված կոռուպցիոն երևույթների վերաբերյալ։

Ա. Սաքունցը նշել է նաև, որ պաշտպանության նախարարը չի տիրապետում իրավիճակին, հետևաբար, իրենք իրենց հարցերն ուղղում են գերագույն գլխավոր հրամանատար Սերժ Սարգսյանին՝ զարմանալի համարելով նրա լռությունը:

7or.am