«Wikileaks»-ը գաղտնազերծել է 2009թ. փետրվարին տեղի ունեցած ՀՀ ԱԺ փոխնախագահ, ՀՀԿ–ական Սամվել Նիկոյանի և ԱՄՆ դեսպանատան ներկայացուցիչների հետ հանդիպման մանրամասները։ Նիկոյանը նրանց տեղեկացրել է, որ այն բանից հետո, երբ խորհրդարանում «Բարգավաճ Հայաստան»–ը և Դաշնակցությունը վճռականորեն քննադատել ու հրապարակավ դեմ են արտահայտվել կառավարության առաջարկած օրենսդրական նախաձեռնությանը, ՀՀ նախագահ Սերժ Սարգսյանն անձամբ հանդիպել է Ռոբերտ Քոչարյանին և ասել. «Դուք կարող եք վարչապետ լինել, սակայն այդ դեպքում պետք է Ձեզ հետ նաև նախագահ բերեք»:

Վաշինգտոն ուղարկված նամակում ՀՀ–ում ԱՄՆ գործերի ժամանակավոր հավատարմատար Ջոզեֆ Փենինգթոնը գրել է, որ քաղաքական այդ հեռակա պատերազմի շարունակվելու դեպքում այն կարող է հանգեցնել լայնածավալ առճակատման։

Սամվել Նիկոյանը նկատել է նաև, որ չնայած Սերժ Սարգսյանի ջանքերին՝ կառավարությանն անվստահություն հայտնելու համար Ռոբերտ Քոչարյանը կարո՛ղ է խորհրդարանում բավարար չափով ձայներ հավաքել։

Իսկ Փենինգթոնը նամակում կարծիք է հայտնել, որ թվում է՝ «Օրինաց երկիր»-ը Սերժ Սարգսյանի ճամբարում է, սակայն այս կուսակցության նախագահ Արթուր Բաղդասարյանն արդեն ապացուցել է՝ եթե որևէ մեկն ավելի ձեռնտու առաջարկ անի, ինքը միշտ պատրաստ է համաձայնվել դրան, իսկ ՀՀԿ–ն թեև Սերժ Սարգսյանի և Տիգրան Սարգսյանի թիկունքում է, սակայն ՀՀԿ–ի վերնախավում էլ կարող են ի հայտ գալ խորքային ճաքեր, հենց որ խաղաքարտերը բացվեն։

Ամերիկացի դիվանագետը եզրակացրել է նաև, որ Ռոբերտ Քոչարյանը դեռևս կսպասի իր համար բարենպաստ ժամանակների, երբ առաջիկա ֆինանսատնտեսական ճգնաժամը վերջնականապես հարվածի վարչապետ ու նախագահ Սարգսյանների վարկանիշներին, հետո արդեն առավել վճռական քայլեր կձեռնարկի իշխանության վերադառնալու համար։

7or.am