Իրանի նախագահ Էբրահիմ Ռաիսին նախազգուշացրել է, որ Իսլամական Հանրապետության դեմ ագրեսիայի ցանկացած գործողություն կարժանանա Իրանի զինված ուժերի «կոշտ պատասխանին», ինչն ագրեսորներին կստիպի զղջալ իրենց արարքի համար, փոխանցում է Mehr-ը։

«Իրանի հզորության առջեւ ոչ մեկի մտքով անգամ չէր անցնի հարձակում սկսել երկրի տարածքի վրա։ Տարածաշրջանային պետությունները հպարտանում են Իրանի հզորությամբ եւ իրենց ապահով են զգում այդ հզորության շնորհիվ»,-ասել է Իրանի նախագահը։

Նա բարձր է գնահատել երկրի առաջընթացը պաշտպանական արդյունաբերության ոլորտում՝ հայտարարելով, որ հակառակորդը հետեւում է իրանցի զինվորականների տեղաշարժին ու պատրաստությանը, սակայն չի կարող որևէ թշնամական գործողություն ձեռնարկել՝ իրանցի զինվորականների հնարավորությունների, արդյունավետ մոբիլիզացման եւ կամքի ուժի պատճառով:

Աղբյուրը՝ news.am