ՀՀԿ խմբակցության ղեկավար  Գալուստ Սահակյանն այսօր  լրագրողների հետ հանդիպման ժամանակ հայտարարել է, թե ՀԱԿ–ը իրավունք չունի իշխանություններին մեղադրել  պայմանավորվածությունների  խախտման համար, քանի որ երկխոսությունն ինքնին հարցեր  քննարկելու և ընդամենը դիտարկումներ անելու համար է։

–Հո այնպես չէ՞, որ  նստեցին, այդ հարցերը քննարկեցին, ու պետք է որոշում կայացնեն, որը պարտադիր  է նաև մյուս քաղաքական ուժերի համար։ Չի կարող այդպես լինել,–ասել է Գալուստ Սահակյանը։

Ըստ նրա՝ երկխոսությունը ՀԱԿ–ին էր ձեռնտու։

–Երկխոսության ամբողջ  գործընթացն ավելի շուտ իրենց կարողացավ քաղաքական ճահճից հանել և բերել քաղաքական դաշտ, քան խնդիրներ լուծեց կոալիցիոն ուժերի համար։ Կոալիցիոն ուժերը  մշտապես էլ պատրաստ են եղել խոսել, և իրենց ամբողջ  գործունեության ընթացքում չի եղել որևէ դեպք, որ որևէ քաղաքական ուժի հետ չցանկանան խոսել,–ասել է Գալուստ  Սահակյանը։

«7օր»–ի այն հարցին, թե իսկ  ՀՀԿ–ի ինչի՞ն էր պետք ՀԱԿ–ին ճահճից հանելը, նա պատասխանել է, թե եթե  օրգանիզմում որևէ հիվանդություն կա, ապա միշտ վտանգ է ներկայացնում ամբողջ  հասարակության համար։

Հարցին, թե հիմա ՀԱԿ–ը դո՞ւրս է եկել այդ ճահճից, նա պատասխանել է,  թե դրա վերլուծությունն ու հարցի պատասխանը պետք է ՀԱԿ–ին թողնել։

7or.am