Դատարանն ապացուցված է համարել  խուլիգանություն կատարելու համար ՀՀ քաղաքացի Կարեն Սահակյանին առաջադրված մեղադրանքը, որը դրսեւորվել է հասարակության եւ եկեղեցու նկատմաբ բացահայտ անհարգալից վերաբերմունքով:

Դատարանը հավաստի է համարել ներկայացված ապացույցներն առ այն, որ 2011թ. մայիսի 20-ին «Սուրբ Երրորդություն» եկեղեցու մոտ Կ. Սահակյանը  անպատվել, վիրավորանքներ է հասցրել հիշյալ եկեղեցու հոգեւոր հովիվ Տեր Եսայի Քահանա  Արտենյանին` այդկերպ դիտավորությամբ խախտելով հասարակական կարգը, բացահայտ անհարգալից վերաբերմունք դրսեւորելով հասարակության եւ եկեղեցու նկատմամբ: 2011թ. հունիսի 23-ին քրեական գործը մեղադրական եզրակացությամբ ուղարկվել է Երեւան քաղաքի Մալաթիա-Սեբաստիա վարչական շրջանի ընդհանուր իրավասության դատարան եւ 2011թ. հուլիսի 7-ին կայացվել է մեղադրական դատավճիռ` համաձայն որի Կ. Սահակյանը դատապարտվել է տուգանքի: Վերաքննիչ բողոք չի ներկայացվել: Ինչ վերաբերում է հոգեւոր հովվի նկատմամբ կիրառված բռնության դեպքի առթիվ հարուցված քրեական գործին, ապա նախաքննությունն ավարտվել է: Մասնավորապես նախաքննությամբ պարզվել է, որ 2011թ. մայիսի 15-ին` ժամը 09:00-ի սահմաններում, նույն` «Սուրբ Երրորդություն» եկեղեցու հոգեւոր հովիվ Տեր Եսայի Քահանա  Արտենյանը, նկատելով, որ «Եհովայի վկաներ» աղանդավորական կազմակերպության անդամներ Ա. Մակվեցյանը եւ Ս. Գրիգորյանը եկեղեցու բակում զբաղված են երկու քաղքացիների քարոզչությամբ, մոտեցել է նրանց  եւ խնդրել հեռանալ եկեղեցու տարածքից: Սակայն  Ա. Մակվեցյանը եւ Ս. Գրիգորյանը հրաժարվել են եկեղեցու բակից հեռանալ եւ վիճաբանել են  Տեր Եսայի Քահանա  Արտենյանի հետ: Տեսնելով, որ նրանք չեն հեռանում` քահանան փորձել է բջջային հեռախոսով նկարել  Ա. Մակվեցյանի եւ Ս. Գրիգորյանի` քարոզչությամբ զբաղվելը: Սակայն Ա. Մակվեցյանը թույլ չի տվել քահանային նկարել` նրա ձեռքից վերցնելով բջջային հեռախոսը: Քահանան փորձել է ետ վերցնել իր հեռախոսը, բայց  Ա. Մակվեցյանը բռունցքով հարվածել է նրա ձեռքին` սպառնալիքներ հնչեցնելով քահանային: Դեպքի առթիվ ոստիկանության Մալաթիայի քննչական բաժնում հարուցվել է քրեական գործ` ՀՀ քրեական օրենսգրքի 118-րդ հոդվածով, 137-րդ  եւ 322-րդ հոդվածների 1-ին մասերով եւ կատարվել  նախաքննություն: Ա. Մակվեցյանին մեղադրանք է առաջադրվել ՀՀ քրեական օրենսգրքի 118-րդ հոդվածով, 137-րդ եւ 322-րդ հոդվածների 1-ին մասերով: 2011թ. հուլիսի 15-ին քրեական գործը մեղադրական եզրակացությամբ ուղարկվել է Մալաթիա-Սեբաստիա վարչական շրջանի ընդհանուր իրավասության դատարան: Դատաքննությունը շարունակվում է: