«Հին Էրիվան Հոլդինգ» ՍՊ ընկերությունը հարկ է համարում հանրությանը տեղեկացնել ներքոշարադրյալի վերաբերյալ:

«Յունիբանկ» ՓԲ ընկերության և «Հին Էրիվան Հոլդինգ» ՍՊ ընկերության (այսուհետ` Ընկերություն) միջև 2007թ. և 2008թ. կնքվել են վարկային պայմանագրեր:

2009թ. մայիսի 25-ին բանկի և ընկերության միջև բանակցությունների արդյունքում կնքվել են երկու համաձայնագրեր, որոնցով այլ գրաֆիկ է նախատեսվել վարկի վերադարձման համար: Նույն օրը, բանկի և ընկերության ղեկավարների բանակցության արդյունքում այդ համաձայնագրերը փոխարինվել են այլ համաձայնագրերով, որոնցով գրաֆիկները կրկին փոխվել են հօգուտ ընկերության:

Ըստ այդ համաձայնագրերի 2011թ. մայիսի 25-ից ընկերությունը սկսելու էր մարումներ կատարել:

25.05.2011թ. ընկերությունը կատարել է իր մարումը վճարելով վերջին համաձայնագրերի գրաֆիկով նախատեսված վարկը և տոկոսը:

Ընկերության ներկայացուցիչների և Բանկի ներկայացուցիչների հանդիպման ժամանակ վարկն ամբողջությամբ վաղաժամկետ մարվելու բանակցությունների ժամանակ, Ընկերության ներկայացուցիչը խնդրել է տրամադրել նաև հաշվարկված տոկոսների հետ կապված հարկային պարտավորությունները կատարված լինելու վերաբերյալ տեղեկանք, կասկածելով, որ բանկը երկու տարվա տոկոսները չի կապիտալիզացրել և այդ մասով հարկ չի վճարել:

Բանկի ղեկավար Վարդան Աթայանը տեղեկանք տրամադրելու փոխարեն հարձակման գործընթաց է սկսել ընկերության դեմ` ընկերությունից պահանջելով ամբողջ վարկի գումարը, իբրև թե ընկերությունը սխալ համաձայնագրերի գրաֆիկով է ղեկավարվել: Բանկի հաջորդ գործողությունն ուղղված է եղել Հին Էրիվան ռեստորանային համալիրի շենքը արտադատական բռնագանձելուն:

Ընկերությունը դիմել է դատարան ընդդեմ Բանկի, ըստ էության խնդրելով ճանաչել նույն օրվա մեջ կնքված երկրորդ համաձայնագրերը:

Բանկի ղեկավար Վարդան Աթայանը դիմել է ՀՀ ոստիկանությանը (6-րդ վարչությանը) մեղադրելով ընկերության ղեկավար Մանվել Տեր-Առաքելյանին համաձայնագրեր կեղծելու մեջ:

ՀՀ ոստիկանության 6-րդ վարչությունը սկսել է լայնածավալ հետաքննական գործունեություն, միջամտելով նաև Ընկերության տնտեսական գործունեությանը:

Բանկի նախաձեռնությամբ սկսված գործընթացքով 6-րդ վարչությունը հարկային մարմնից պահանջել է ստուգումներ անցկացնել ընկերությունում:

23.08.2011թ. 6-րդ վարչության 1-ին վարչության աշխատակից Էդգար Մնացականյանը բացատրություններ ստանալու պատրվակով կանչել է Մանվել Տեր-Առաքելյանին և մինչև գիշեր (ժամը 22-ի սահմաններում) չէին թույլատրում դուրս գալ ոստիկանատնից, մինչև չգրի, որ պարտք է Յունիբանկին: Ընդ որում, Մանվել Տեր-Առաքելյանի գրած յուրաքանչյուր նախադասության համար, ոստիկանը դուրս էր գալիս հեռախոսազանգի միջոցով ճշտումներ անելու Բանկի ղեկավար Վարդան Աթայանից:

Մանվել Տեր-Առաքելյանը բազմիցս հայտարարելով, որ բանկի և ընկերության վեճը զուտ քաղաքացիաիրավական է, փաստաբանի միջոցով 6-րդ վարչությանը ներկայացնելով փորձագետի եզրակացությունը նշված համաձայնագրերի իրական լինելու վերաբերյալ, կրկին չի կարողանում ազատվել Յունիբանկ-ի Վարդան Աթայանի միջոցով ոստիկանության ճնշումներից:

Ընկերության կոչը`

1. «Հին Էրիվան Հոլդինգ»  ՍՊ ընկերությունը պաշտոնապես կոչ է անում ՀՀ ոստիկանության ԿՀԴՊ գլխավոր վարչության 1-ին վարչությանը (Ս.Ջեյրանյան) հեռու մնալ ընկերության տնտեսական գործունեությանը միջամտելուց և խստորեն պահպանել «Ոստիկանության մասին» ՀՀ օրենքով իր վրա դրված պարտականությունները ու ծառայել հասարակությանը և ոչ թե միայն Յունիբանկին:

2. «Հին Էրիվան Հոլդինգ»  ՍՊ ընկերությունը պաշտոնապես կոչ է անում «ՅՈՒՆԻԲԱՆԿ» ՓԲԸ-ի բաժնետերերին` ստուգեք բանկի ղեկավար Վարդան Աթայանի գործունեությունը, քանի որ նա բանկի հաճախորդների հետ կապված հարցերը լուծում է ոստիկանության և հարկային մարմինների միջոցով (մեր տեղեկություններով մենք առաջին դեպքը չենք, իսկ գաղտնիք չէ, որ վարկ վերցնելիս վարկառուները բանկին հայտնում են նաև գաղտնիք պարունակող տեղեկություններ), և իր անձնական ամբիցիաների համար օգտագործում է Բանկի ռեսուրսները:

Հ.Գ. Մեր ընկերությունը մոտ ապագայում հանրության սեփականությունը կդարձնի Յունիբանկի ղեկավար Վարդան Աթայանի և ՀՀ ոստիկանության 6-րդ վարչության հետ կապված այլ հետաքրքիր տեղեկություններ:

«Հին Էրիվան Հոլդինգ» ՍՊ ընկերության

տնօրեն` Մնացական Իսպիրյան