Քաղաքագետ Սուրեն Սուրենյանցը համացանցի իր անձնական էջում վերջերս գրել էր. «ԱՍԱԼԱ-ն ահաբեկչական կազմակերպություն է՝ ինձ համար նույնքան զազրելի, որքան մյուս նմանատիպ կառույցները։ Միայն այն բանի պատճառով, որ նրանք թուրք են սպանել, իմ համար հերոսներ չեն դառնում»։

Սուրենյանցը հայտարարել էր նաև, թե ԱՍԱԼԱ–ի անդամները սպանել են անմեղ մարդկանաց, հաճախ միայն այն պատճառով, որ նրանք թուրքեր են:

«Եթե սա քաջություն է, ուրեմն այդ բառը երիցս իմաստազրկվել ու անբովանդակ է դարձել: Ահաբեկչությունը չի կարող լուսավոր նպատակի ծառայել, չի կարող հատուցում լինել 1,5 միլիոն անմեղների համար։ Ահաբեկչությունը ծնում է նոր բռնություն, նոր «արդարացումներ» նոր ահաբեկության համար։ Երբ մի տականք թուրք երեխայի է սպանում, դրանով չի հավերժացնում 1915-ի անմեղների հիշատակը, այլ ընդամենը մեկ այլ տականքի համար Դինքի պես լուսավոր մարդուն սպանելու «մոտիվացիա» է ստեղծում: Հայ և թուրք ահաբեկիչները դաշնակից են՝ քաղաքացիական արժեքով ապրող թուրքի և նույն արժեքներով ապրող իմ պես հայերի դեմ: Մի օր Թուրքիան ընդունելու է իր պատմության սև ու ամոթալի էջերի գոյությունը: Ընդունելու է՝ քաղաքակիրթ երկիր գնացող ճանապարհին: Ու այդ իրողությունը տեղի է ունենալու հայ-թուրքական երկխոսության դաշտում»,–եզարահանգել էր նա:

Սուրենյանցի այս հայտարարությունը բուռն արձագանք է ստացել հայ հասարակության շրջանում։ Չի ուշացել նաև ԱՍԱԼԱ–ի պատասխանը՝ «Մենք ահաբեկիչներ չենք» վերտառությամբ։

«Հայաստանի ազատագրության հայ գաղտնի բանակ»–ի հայտարարության մեջ ասված է, որ վերջերս Արևմուտքի, Թուրքիայի և Մասոնական շարժումների կողմից հրապարակ կնետվեն հայ թափթփուկներ, որոնք ազատական, վերազգային թե աշխարհաքաղաքացիական պատմուճանով հանդես գալով՝ կշոշափեն հայ ազգի բազկերակը:

«Բնականաբար, այդ բազկերակը շոշափելու հարմարագույն միջոցն է հայ ազգի նրբագույն լարերի հետ խաղալու փորձը՝ հիմնական թիրախ ունենալով «ԱՍԱԼԱ-ի ահաբեկչությունը»: Ռիչարդ Կիրակոսյանը Անկարայից, Սուրեն Սուրենյանցը Երևանից, Պապից ավելի պապ կամ ավելի ճիշդ՝ թուրքից ավելի թուրք կդառնան, երբ ԱՍԱԼԱ-ի ազգային-ազատագրական պայքարը կներկայացնեն որպես «ահաբեկչություն» և նրա ազատամարտիկներին՝ «ոճրագործներ,–ասված է այդ հայտարարությունում։–Հավատարիմ իր հիմնադիր-ղեկավար նահատակ Հակոբ Հակոբյանի քաղաքական հստակ գծին՝ Հայաստանի ազատագրության հայ գաղտնի բանակն իր հարվածների թիրախ ընտրել է թրքական պետությունը և ոչ թե թուրք ժողովուրդին: ԱՍԱԼԱ-ն պատահական անմեղ թուրք սպանող վրիժառու, ահաբեկիչ կամ ոճրագործ նկատող կիրակոսյանները կամ սուրենյանցները գիտեն այս մասին, բայց նրանց տրված է հայ հասարակության մտքերը պղտորելու դերակատարությունը, որ կկատարեն երբեմն փորձագետի ապիկարությամբ և երբեմն՝ ապիկարի փորձագիտությամբ: Հակոբյանը ողջ է, բոլորս Հակոբյան ենք»:

Այս հայտարարությանն ի պատասխան՝ Սուրեն Սուրենյանցը հոգ չի համարել, որ ԱՍԱԼԱ–ն իր հայտարարությամբ իրեն Արևմուտքի կամ Թուրքիայի գործակալ է անվանել:

«Ահաբեկիչը չի կարող արժևորել իսկական հերոսին, նաև՝ իսկական հերոս գնահատողին: Ու լավ է, որ չի կարող արժևորել»,–նշել է Սուրենյանցը։

7or.am