Գերմանական Volkswagen ավտոարտադրողը մինչև տասնամյակի վերջը կկենտրոնանա լյուքս դասի մեքենաների վրա՝ կրճատելով ներքին այրման շարժիչով մոդելների շարքը և, ընդհանուր առմամբ, ավելի քիչ մեքենաներ վաճառելով։ Այս մասին հայտարարել է VW-ի ֆինանսական տնօրեն Առնո Անտլիցը Financial Times-ին տված հարցազրույցում։

Նրա խոսքով՝ ընկերությունը պատրաստվում է կենտրոնանալ լյուքս դասի մեքենաների արտադրության վրա, որոնք ավելի շատ շահույթ են բերում։ Այժմ VW-ն աշխարհում զբաղեցնում է երկրորդ տեղը Toyota-ից հետո՝ վաճառված մեքենաների քանակով։ Բացի այդ, մինչ այժմ կորպորացիան հայտնի է եղել բավականին զանգվածային և բյուջետային մեքենաներով, նշում է «Коммерсантъ»-ը։

Անթլիցը նշել է, որ ընկերությունը նպատակ ունի 60 տոկոսով նվազեցնել ներքին այրման շարժիչների և հիբրիդային մեքենաների քանակը Եվրոպայում։ VW ապրանքանիշերն այժմ արտադրում են նման մեքենաների մոտ 100 մոդել: «Առանցքային նպատակը աճը չէ։ Մենք ավելի շատ կենտրոնանում ենք որակի և շահութաբերության, քան ծավալների և բաժնետոմսերի վրա»,-ասել է նա։