Հարավային Ամերիկայում լիճ է ցամաքել, որի պաշարները կբավականացնեին մոտ երկու միլիոն մարդու, հայտնում է The Independent-ը։

Արմատական ​​փոփոխություններին հնարավոր եղավ հետևել արբանյակային պատկերների շնորհիվ։ Վերջին զեկույցի համաձայն՝ Պենյուելաս լճի ներկայիս տարողունակությունը հազիվ է հասնում 170 հազար խորանարդ մետրի, ինչը կազմում է դրա 95 միլիոն խորանարդ մետր ընդհանուր հզորության միայն 0.2 տոկոսը։ Ջրամբարը չորացել է տարիների երաշտի պատճառով, գործընթացը տևել է վեց տարի։

Պենյուելաս լիճը, որը գտնվում է Չիլիի մայրաքաղաք Սանտյագոյից 43 կիլոմետր հեռավորության վրա, ջրի մատակարարման հիմնական աղբյուրն էր տեղի բնակիչների համար։ Այժմ դրանցից շատերին խմելու ջուր բեռնատարներով են բերում։ Ջրի բացակայության պատճառով տասնյակ հազարավոր գյուղատնտեսական կենդանիներ սատկել են։ 2019 թվականի օգոստոսին Չիլիի կառավարությունը գյուղատնտեսության ոլորտում արտակարգ դրություն էր հայտարարել ավելի քան 50 շրջաններում խնդիրների պատճառով:

2010 թվականից Չիլիում անոմալ երաշտներ են։ Վերջին տասնամյակում երկրի կենտրոնական հատվածում տեղումները միջինից ցածր են եղել 45 տոկոսով, իսկ մայրաքաղաք Սանտյագոյում այն կազմել է նորմայի մոտ 10-20 տոկոսը: Չիլիում երաշտն ամենասարսափելին և ամենաերկարն է ժամանակակից պատմության մեջ, և գիտնականները կարծում են, որ այն 25 տոկոսով կապված է կլիմայի փոփոխության հետ:

Աղբյուրը՝ news.am