Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել է, որ այլ երկրների տարածքում, այդ թվում՝ Ղարաբաղում լրացուցիչ ճակատների բացումը Ուկրաինային մեծապես կօգնի պայքարել ռուսական հարձակման դեմ։

Ինչպես տեղեկացնում է ուկրաինական Pravda կայքը, այդ մասին Դանիլովը հայտարարել է հեռուստամարաթոնի եթերում։

«Այն բանից հետո, երբ Լեռնային Ղարաբաղը իր տարածքում ռազմական դրություն մտցրեց, կարող եմ ասել՝ այնտեղ իրոք իրադարձություններ են տեղի ունենում»,-ասել է նա՝ նշելով, որ Լեռնային Ղարաբաղում «Բայրաքթարներ» են աշխատել։

«Եվ Հայաստանն այսօր դիմել է Ռուսաստանի Դաշնությանը՝ զորքերով օգնելու համար։ Բայց նրանք այնտեղից զորքերը հանել ու անցյալ շաբաթ ուղարկել են մեր երկիր։ Մենք հետևում էինք այդ շարասյուների շարժին: Եվ մենք հասկանում ենք՝ օգնությունը, որը Ռուսաստանի Դաշնությունը խոստացել է Լեռնային Ղարաբաղին և Հայաստանին, դժվար թե այնտեղ հայտնվի»,-ասել է Դանիլովը։

Նա խոսել է նաև Ճապոնիայի՝ Կուրիլյան 4 կղզիների պատկանելիությանն առնչվող հայտարարության մասին, ինչից հետո ՌԴ-ն զորավարժություններ է սկսել, սակայն փոքրաթիվ զորքով, քանի որ նրանք բոլորին Ուկրաինա են ուղարկել։

«Թե ինչպես կավարտվի այս իրավիճակը, դեռ հայտնի չէ։ Բայց եթե Ռուսաստանի Դաշնության համար բացվեն երկրորդ ճակատներ, որը նա արհեստականորեն ստեղծեց սեփական գործողություններով, ապա դրանք մեզ որակապես շատ կօգնեն»,-հայտարարել է Ուկրաինայի Ազգային անվտանգության և պաշտպանության խորհրդի քարտուղարը։

Աղբյուրը՝ tert.am