Եվրամիությունը շուտով Ուկրաինային կտրամադրի ֆինանսական օգնության առաջին տրանշը` 300 մլն եվրոյի չափով։ Այս մասին ճեպազրույցի ժամանակ հայտարարել է վարչապետ Դենիս Շմիգալը։

«Հաջորդ շաբաթ ակնկալում ենք 300 միլիոն եվրոյի մակրոֆինանսական աջակցության առաջին տրանշը Եվրամիությունից, որը մեզ շտապ տրամադրեց 1,2 միլիարդ եվրո, մեկ շաբաթ անց՝ երկրորդ տրանշը»,-ասել է նա։

Կառավարության ղեկավարի խոսքով՝ ուկրաինամետ կոալիցիային միանում են ավելի ու ավելի շատ երկրներ։

«Համաշխարհային բանկը հավանություն է տվել Ուկրաինային 700 միլիոն դոլարի օգնության փաթեթին: Այսօր Եվրոպական Վերակառուցման և զարգացման բանկը հայտարարել է 2 միլիարդ եվրոյի «Կայունության փաթեթ» հատկացնելու մասին՝ Ուկրաինային աջակցելու համար»,-ասել է Շմիգալը։

Կառավարության ղեկավարը հավելել է, որ այս գիշեր Արժույթի միջազգային հիմնադրամը կքննարկի Ուկրաինային 1,4 մլրդ դոլար շտապ օգնություն հատկացնելու հարցը։

Հավելենք, որ լույս մարտի 10-ն ԱՄՆ Կոնգրեսի Ներկայացուցիչների պալատը քվեարկել է Ուկրաինային 13,6 միլիարդ դոլարի ֆինանսական օգնություն հատկացնելու օգտին։ Այդ գումարից մոտ 6,5 միլիարդը հատկացվել է Պենտագոնին՝ Ուկրաինային ռազմական օգնության համար, մնացածը՝ մարդասիրական և տնտեսական օգնության այլ գերատեսչություններին։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։

Աղբյուրը՝ tert.am