Չինական ընկերությունները կարող են բախվել ԱՄՆ-ի կոշտ գործողությունների, եթե հրաժարվեն կատարել հակառուսական պատժամիջոցները: Այս մասին The New York Times-ում հրապարակված հարցազրույցում ասել է ԱՄՆ առևտրի նախարար Ջինա Ռայմոնդոն։

Այդ դեպքում Միացյալ Նահանգներն արգելելու է Չինաստանում արտադրության համար անհրաժեշտ սարքավորումների և ծրագրային ապահովման մատակարարումը, ասել է պաշտոնյան:

«Ռուսաստանը, անշուշտ, կդիմի մյուս երկրներին՝ շրջանցելու մեր պատժամիջոցները և արտահանման վերահսկողությունը»,-ասել է Ռայմոնդոն:

Բայց եթե ԱՄՆ-ն պարզի, որ Շանհայում կիսահաղորդչային արտադրող SMIC-ի նման կորպորացիան առաքում է իրականացնում Ռուսաստան, ապա ԱՄՆ-ն «ուղղակի կփակի այն և կկանխի դրա սարքավորումների և ծրագրային ապահովման օգտագործումը», շեշտել է առևտրի նախարարը:

«Սա կործանարար հարված կհասցնի Չինաստանի՝ այս չիպերն արտադրելու կարողությանը»,-սպառնացել է Ռայմոնդոն:

Աղբյուրը՝ tert.am