Լրագրողների հետ  հանդիպման ժամանակ ԱԺ ՕԵԿ խմբակցության անդամ Խաչիկ Հարությունյանը, անդրադառնալով  ՀԱԿ–իշխանություն երկխոսության առաջին հանդիպմանը, ասել է, որ այն բավական դրական հունով է ընթացել, թեպետ երկու կողմի սպասելիքները քիչ էին։

–Մենք, ի վերջո, հանգեցինք այն եզրակացության, որ երկխոսությունը միտում ունի շարունակվել։ Ներկա պահին իրենք լավատես են, քանի որ երկխոսությունը մեկնարկել է շատ դրական հիմքով,–ասել է նա։

Ըստ Խաչիկ Հարությունյանի՝ ընդդիմադիրների պահանջներից հիմնականը վերաբերել է Հայաստանում արտահերթ ընտրություններ անցկացնելու հարցին, որի համար ինքը  բավարար քաղաքական ու իրավական հիմքեր չի տեսնում։

–ՕԵԿ–ը միշտ էլ հավատարիմ է եղել ու բազմիցս հայտարարել է, որ կողմ է ոչ թե քաղաքական թշնամությանը, այլ քաղաքակիրթ մրցակցությանը։ Փողոցային քաղաքականությունը պետք է տեղափոխել սեղանի շուրջ,–նշել է նա։

ՕԵԿ պատգամավորը շատ հավանական է համարել, որ առաջիկա ընտրություններից հետո ՀԱԿ–ը հայտնվի խորհրդարանում։

Անդրադառնալով իշխանություն–ՀԱԿ առաջիկա հանդիպմանը՝ Խաչիկ Հարությունյանը նշել է, որ դեռևս հստակ ձևավորված օրակարգ չկա, սակայն լուրջ քննարկումներ են սպասվում։