ՌԴ նախագահ Վլադիմիր Պուտինի խոսքերն այն մասին, թե ինչպես են ձևավորվել ժամանակակից Ուկրաինայի սահմանները, չեն վերաբերում նախկին ԽՍՀՄ մյուս հանրապետություններին, մասնավորապես՝ Ղազախստանին։ Այս մասին հայտարարել է Պուտինի մամուլի քարտուղար Դմիտրի Պեսկովը, փոխանցում է Интерфакс-ը։

«Ոչ, չի վերաբերում»,-ասել է Պեսկովը՝ պատասխանելով լրագրողի համապատասխան հարցին։

Նա հավելել է, որ «հետագա որոշ ասուլիսների, մամուլի ներկայացուցիչների հետ շփման ընթացքում» Պուտինը կարող է պարզաբանել իր հայտարարությունները։

Փետրվարի 21-ին, ելույթ ունենալով ԴԺՀ-ի և ԼԺՀ-ի անկախության ճանաչման մասին հեռուստաուղերձում, Վլադիմիր Պուտինը հայտարարել էր, որ «ժամանակակից Ուկրաինան ամբողջությամբ ստեղծվել է Ռուսաստանի, ավելի ճիշտ՝ բոլշևիկյան, կոմունիստական Ռուսաստանի կողմից»: Պուտինի խոսքով՝ Ուկրաինան «նույնիսկ այսօր իրավամբ կարելի է անվանել «Ուկրաինա Վլադիմիր Իլյիչ Լենինի անունով», քանի որ նա դրա հեղինակն ու ճարտարապետն է։

Աղբյուրը՝ tert.am