Վրացական «Սանսխրետիս Կարիբժե» գործակալությունը Հայաստանում Վրաստանի նախկին դեսպան Ռևազ Գաչեչիլաձեի հետ հարցազրույց է ունեցել։

Նախկին դեսպանը հարցազրույցում խոսել է տարածաշրջանային խնդիրների մասին և մեկնաբանել ղարաբաղյան հակամարտության կարգավորման իրավիճակը։

Հայաստանում Վրաստանի նախկին դեսպանի կարծիքով Հարավային Կովասում հակամարտությունները հնարավոր է կարգավորել, եթե յուրաքանչյուր երկիր ընդունի իր սահմաններն այնպես, ինչպես ընդունված է միջազգայնորեն, և «բավարարվի նրանով, ինչ ունի»։

–Հնարավոր է՝ դա արդարացի չէ, բայց ավելի լավ է պահպանել այն, ինչ ունես, քան աշխատել խլել ուրիշից։ Օրինակ՝ վրացիները հավատում են, որ Սոչին իրենց է պատկանում, քանի որ այդ քաղաքը Վրաստանի կազմում էր XIII դարում, բայց այսօր XXI դարն է, և ինչ–որ պահանջներ ներկայացնելն ուղղակի աբսուրդ է։ Վրաստանի սահմանները հաստատվել են 1991–ին, և դա է արդարացի. մեր հարևանները պետք է հարգեն դրանք,–ասել է Ռևազ Գաչեչիլաձեն։

Նախկին դեսպանի կարծիքով յուրաքանչյուր հակամարտություն յուրահատուկ է, և չի կարելի ղարաբաղյան հակամարտությունը համեմատել Աբխազիայի հետ կամ Աբխազիայի խնդիրը՝ Հարավային Օսիայի։

Անդրադառնալով Վրաստանի մասնակցությանը ղարաբաղյան հակամարտությանը՝ նախկին դեսպանը հաղորդել է.

–Վրաստանը երբեք չի կարող որոշել այդ խնդիրն Ադրբեջանի և Հայաստանի թիկունքում։ Դա չեն կարող անել ո՛չ Ռուսաստանը, ո՛չ ԱՄՆ–ը, ո՛չ Արևմտյան Եվրոպան։ Այդ հարցը պետք է լուծեն այդ երկրների ժողովուրդներն ու կառավարությունները։ Վրաստանը ոչ մի դեպքում չի խառնվի ղարաբաղյան հակամարտությանն ու դեղատոմսեր չի առաջարկի։ Ես այս ամենն ասում եմ Վրաստանի ղեկավարության և ժողովրդի անունից, քանի որ նրանք չեն ուզում ինչ–որ մեկի կողմն անցնել։ Ադրբեջանն ու Հայաստանը պետք է հարգեն Վրաստանի դիրքորոշումը։