«Առցանց ազատականների ալյանս» կամ 3Ա նախաձեռնության ղեկավար Կարապետ Ռուբինյանը երեկ տեղի ունեցած ՀԱԿ–կոալիցիա հանդիպումից տպավորություն ունի, որ բանակցող կամ երկխոսող կողմերն իրենք էլ չգիտեն՝ ինչով են զբաղվելու: Մեկնաբանելով այդ հանդիպումը՝ նա «7օր»–ին ասել է.

–Ինչ-որ դատարկ հայտարարություններ են արվում նոր քաղաքական մշակույթի ձևավորման ու իշխանություն-ընդդիմություն երկխոսության համար գոյացող նոր հարթակի մասին: Ըստ էության՝ դեռ ոչինչ տեղի չի ունեցել, և քննարկելու բան էլ չկա, բայց շոուն՝ ցուցքը, ընթանում է, և, ըստ ամենայնի, դեռ երկար կընթանա: Մի բան հաստա՛տ գիտեմ՝ կողմերից ոչ մեկին ես՝ որպես ՀՀ քաղաքացի, չեմ լիազորել՝ խոսելու և գործելու իմ անունից: Այսպես կոչված իշխանության ներկայացուցիչները, որոնց ամենայն հարգանքով պատրաստվում է լսել Կոնգրեսը, ինձ համար ՀՀ-ում իշխանությունը յուրացրած հանցախմբի անդամներ են, այն էլ՝ բռնապետի խորհրդարանական սպասարկուների դերակատարությամբ: Բանակցել նրանց հետ այնպիսի խնդրի շուրջ, ինչպիսին Սերժ Սարգսյանի հրաժարականն է, նշանակում է զբաղվել աչքակապությամբ ու ժամավաճառությամբ: Հասկանալի է, որ բռնապետի հետ իր հրաժարականի պայմանների շուրջ շատ կարճ բանակցություն կարող է ընթանալ միայն այն դեպքում, երբ համաժողովրդական ճնշում կազմակերպելով արդեն պարտադրել ես այդ հրաժարականը: Իմ պատկերացմամբ՝ ժողովրդին համախմբելով բռնապետին հրաժարական պարտադրելն ու դրանից հետո Սահմանադրությամբ հաստատված կարգով արտահերթ, ազատ ու արդար ընտրությունների ապահովումն էր ՀԱԿ-ի հիմնական առաքելությունը, ինչում նա ցավալիորեն թերացավ, ուստի չունի մանդատ այլ բաների, մասնավորապես ժողովրդի անունից «գյալաջի» անելու համար:

7or.am