Էրեբունի պլազայում ընթացող ՀԱԿ–իշխանություն պատվիրակությունների առաջին հանդիպման ավարտին իշխանության ներկայացուցիչներից ՀՀԿ պատգամավոր, կոալիցիայի պատվիրակության անդամ Դավիթ Հարությունյանը հայտարարեց, թե հանդիպումը բավական հուսադրող էր։

Նրա խոսքերով՝ իշխանությունը երկխոսությունն ընկալում է որպես քաղաքական նոր մշակույթի ձևավորման հիմք, ինչը սակայն չի նշանակում, թե բացարձակ հակամարտությունից կողմերն անցնելու են համագործակցության:

–Մեր  պատվիրակությունը ճշգրտել է, որ մենք ներկայացնում ենք իշխող կոալիցիային՝ այսինքն՝ գործադիր իշխանությանը, խորհրդարանական մեծամասնությանն ու ՀՀ նախագահին՝ որպես կոալիցիայի ղեկավարի,–ասել է նա։

Իսկ ՀԱԿ համակարգող Լևոն Զուրաբյանն էլ ասել է, թե քննարկման ժամանակ  մի շարք կարևոր հանգամանքներ  ի հայտ եկան, որը  թույլ է տալիս ավելի լուրջ վերաբերել այս պատվիրակությանը։

–Եթե այդ հանգամանքները հանրության սեփականություն դառանան, այսինքն իշխանությունների ներկայացուցիչները բացահայտորեն ասեն այն ինչը հանդիպման ժամանակ մեզ ասացին, ապա մենք կուսումնասիրենք դա և կասենք մեր  կարծիքն այս ամենի մասին,–ասել է նա։

Ըստ Զուրաբյանի՝ հանդիպման ժամանակ պարզվել է, որ իրականում իշխանության պատվիրակությունն ունի ավելի մեծ լիազորություններ, քան հայտարարվել էր նախապես:

Լևոն Զուրաբյանի խոսքով՝ որևէ քննարկում չի եղել օրակարգի մասին, ընդամենը կողմերն իրենց դիրքորոշումներն են ներկայացրել: ՀԱԿ–ը, նրա խոսքով, նշել է, որ երկրում ստեղծված ճգնաժամային իրավիճակից միակ ելքը արտահերթ նախագահական և խորհրդարանական ընտրություններն են:

–Մեր տեսակետն անփոփոխ է, խնդիրը կարող է կարգավորվել միայն արտահերթ նախագահական և խորհրդարանական ընտրություններով,-ասել է նա։

7or.am