Հուլիսի 11–ին Կենտրոնական ընտրական հանձնաժողովի արտահերթ նիստից հետո ԿԸՀ նախագահ Գարեգին Ազարյանը լրագրողներին հայտնել էր, որ թեև սկզբում դիմել է ՄԻՊ–ի կողմից ԿԸՀ անդամ նշանակվելու համար, սակայն հետո հրաժարվել է, քանի որ, ինչպես Գարեգին Ազարյանն է մի քանի անգամ կրկնել, ավելի նպատակահարմար է գտել, որ ԿԸՀ գործող նախագահը նշանակվի ոչ թե ՄԻՊ–ի, այլ մեկ այլ մարմնի կողմից, և այդ հարցով դիմել է ՀՀ վճռաբեկ դատարան:

Ուշագրավ է, սակայն, որ ինչպես ՄԻՊ գրասենյակից են հաղորդել «7օր»–ին, հուլիսի 7–ին Ազարյանը մասնակցե՛լ է ՄԻՊ–ի կողմից ԿԸՀ անդամ նշանակվելու մրցույթին, հարցազրույցի ժամանակ պատասխանել է ՄԻՊ գրասենյակի հանձնաժողովի անդամների առնվազն 5 հարցի։ Այսինքն՝ Գարեգին Ազարյանը ոչ թե ինքն է հրաժարվել ՄԻՊ–ի կողմից նշանակվել ԿԸՀ անդամ, այլ պարզապես չի հաղթահարել մրցույթը։

Նույն իրավիճակն է նաև ԿԸՀ նախկին քարտուղար, ՀՀԿ–ական Աբրամ Բախչագուլյանի առնչությամբ։ ՄԻՊ գրասենյակից «7օր»–ին ասել են, որ Աբրամ Բախչագուլյանը հուլիսի 7–ին նույնպես մասնակցել է ՄԻՊ–ի մրցույթին: Փաստորեն, ինչպես Գարեգին Ազարյանը, նա ևս չի՛ հաղթահարել հարցազրույցի փուլը։ Հատկանշական է, որ Աբրամ Բախչագուլյանը «7օր»–ի հետ զրույցում պնդել էր, թե ինքնաբացարկ է հայտնել, անձամբ է հրաժարվել ԿԸՀ անդամ լինելուց, քանի որ իրեն այլ պաշտոն են առաջարկել։ Կարելի է ենթադրել, որ թե՛ Գարեգին Ազարյանը, և թե՛ Աբրամ Բախչագուլյանը Մարդու իրավունքների պաշտպանի հայտարարած ԿԸՀ անդամների մրցույթը չհաղթահարած այն 4 թեկնածուներից երկուսն են, ովքեր պատշաճ չեն հիմնավորել իրենց քաղաքական չեզոքությունը:

Նշենք, որ այս պատմություններից հետո Գարեգին Ազարյանը ՀՀ նախագահ Սերժ Սարգսյանի հրամանագրով և Վճռաբեկ դատարանի նախագահի առա­ջա­ր­կով նշանակվել է Կենտրոնական ընտրական հանձնաժողովի անդամ, իսկ Աբրամ Բախչագուլյանը ՀՀ վարչապետ Տիգրան Սարգսյանի որոշմամբ նշանակվել է Գյուղատնտեսության նախարարության սննդամթերքի անվտանգության պետական ծառայության պետ։

7or.am