Բրյուսելում կայացել է Ադրբեջանի նախագահ Իլհամ Ալիևի և ՆԱՏՕ-ի գլխավոր քարտուղար Ենս Ստոլտենբերգի հանդիպումը։ Հանդիպումը կայացել է Ալիևի՝ Բելգիայի մայրաքաղաք Բրյուսել կատարած այցի շրջանակներում։ Հանդիպումից հետո տեղի է ունեցել համատեղ մամուլի ասուլիս։

Ասուլիսի ընթացքում Ստոլտենբերգը հայտարարել է, որ Հարավային Կովկասում անվտանգությունն ու կայունությունը կարևոր են բոլորի համար:

«Բոլոր մարդկանց համար խաղաղ ապագա երաշխավորելու նպատակով մենք աջակցում ենք հարաբերությունների կարգավորմանն Ադրբեջանի և Հայաստանի միջև, որոնք երկուսն էլ արժեքավոր գործընկերներ են ՆԱՏՕ-ի համար»,-ասել է հյուսիսատլանտյան դաշինքի ղեկավարը:

Ալիևը, իր հերթին, նշել է, որ քննարկվել է Հարավային Կովկասում հետպատերազմական իրավիճակը՝ ընդգծելով, որ Բաքուն հավատարիմ է տարածաշրջանում կայունությանն ու կանխատեսելիությանն ուղղված ջանքերին:

Նրա խոսքով՝ տարածաշրջանում նոր պատերազմի ռիսկը նվազեցնելու համար լավագույն միջոցը հաղորդակցությունների բացումն է, ակտիվ երկխոսության վարումն ու նորից հարևաններ լինել սովորելը:

«Եթե հայկական կողմից բարի կամքի դրսևորում լինի, մենք կարող ենք սկսել երկու երկրների միջև խաղաղության պայմանագրի վրա աշխատել ու վերջ դնել թշնամանքին»,-ասել է Ալիևը:

***

Ադրբեջանի նախագահ Իլհամ Ալիևը Բրյուսելում ՆԱՏՕ-ի գլխավոր քարտուղար Ենս Ստոլտենբերգի հետ հանդիպումից հետո մասնակցել է համատեղ մամուլի ասուլիսին, որի շրջանակում անդրադարձել է այսպես կոչված «Զանգեզուրի միջանցքին»:

Նա մասնավորապես նշել է, որ «Զանգեզուրի միջանցքի» բացման առաջարկը ներառված է նախորդ տարվա նոյեմբերի իննի եռակողմ հայտարարության մեջ, ուստի, ըստ Ադրբեջանի նախագահի, Հայաստանի համար պարտավորության պես բան է ապահովել բոլոր անհրաժեշտ հարմարությունները:

«Այս փուլում մենք պայմանավորվել ենք երկաթուղային հաղորդակցություն կառուցել Հայաստանի տարածքով Ադրբեջանցից դեպի Նախիջևանի Ինքնավար Հանրապետություն և նաև պայմանավորվել ենք մայրուղու կառուցման շուրջ: Սակայն մայրուղու հստակ ճանապարհը չի որոշվել. դա ապագա քննարկումների հարց է, որն, անկասկած, կքննարկվի այսօր երեկոյան՝ եռակողմ հանդիպմանը: Զանգեզուրի միջանցքի իրավական ռեժիմը պետք է լինի նույնը, ինչ Լաչինի միջանցքինը: Լաչինի միջանցքում մաքսակետեր չկան։ Ըստ այդմ՝ Զանգեզուրի միջանցքում մաքսակետեր չպետք է լինեն։ Եթե Հայաստանը ցանկանում է վերահսկել բեռները և մարդկանց, մենք մաքսակետ կբացենք Լաչինի միջանցքում»,- հավելել է Ալիևը։

Աղբյուրը՝ tert.am