Լրագրողների հետ  հանդիպման ժամանակ ԱԺ ԲՀԿ խմբակցության անդամ Վարդան Բոստանջյանը, անդրադառնալով ՀԱԿ–իշխանություն պատվիրակություններով երկխոսությանը, ասել է, որ այս գործընթացը նորմալ է գնահատում։

Պատասխանելով հարցին, որ նախագահի մամլո խոսնակի՝ պատվիրակություններ ձևավորելու մասին հայտարարությունից առաջ իր կոալիցիոն գործընկերները  հայտարարում էին, թե պատվիրակություններով բանակցություններն անընդունելի են, ի՞նչն է պատճառը, որ այդպես կտրուկ կարծիքը փոխվեց, Ղարաբաղի խնդրի հետ կապվա՞ծ է այս փոփոխությունը, Վարդան Բոստանջյանը պատասխանել է, որ ինքն էլ  կարող է այդ հարցադրման ձևով մտածել։

–Բայց իմ պատասխանը կլինի փնտրտուքի մեջ, որը կարող է իրականությանը  համապատասխանող կամ չհամապատասխանող խոսք լինել, բայց հիմա ովքեր ինչ են ասել՝ կարող եք իրենցից հարցնել,–ասել է նա։

Հարցին՝ եթե հիմա այդ հարցի պատասխանը պետք է փնտրվի, կարելի՞ է  ենթադրել, որ կոալիցիան տեղյակ չի եղել այս ամենից, և հերթական գիշերային որոշումն է կայացվել, Վարդան Բոստանջյանը պատասխանել է, որ եթե այդպես է հարմար մտածել, այդպես էլ  մտածենք։

–Բայց այդ որոշումից տեղյակ եղե՞լ եք,–հարցրել են լրագրողները։

–Բացե՛ք Կառմեն Դավթյանի հոդվածը, կարդացե՛ք. նա պատվիրակության ստեղծման մասին նախագահի մամլո խոսնակի խոսքերից դեռ մեկ ամիս առաջ է գրել։ Այսինքն, մենք տեղյակ ենք այդ հնարավորության մասին։ Այո՛, կարող են պատվիրակության  անդամների որոշակի փոփոխություններ լինել, բայց մենք մոտավորապես գիտեինք, որ այդ պատվիրակությունը լինելու է,–ասել է նա։

–Իսկ եթե կոալիցիան դրա մասին գիտեր, ինչո՞ւ էր  նման հայտարարություններ անում, թե պատվիրակությունն անընդունելի է,–հարցրել են լրագրողները։

–Է՜, գնացե՛ք, իրենցից հարցրե՛ք, իա՜, ինչո՞ւ եք ինձնից հարցնում,–պատասխանել է Վարդան Բոստանջյանը։

7or.am