«Ե՛վ Վաշինգտոնում, և՛ Մոսկվայում հասկանում են, որ արագ լուծումների դեղատոմս իսկապես գոյություն չունի»,– այսօր լրագրողների հետ հանդիպման ժամանակ անդրադառնալով Լեռնային Ղարաբաղի հակամարտության կարգավորման շուրջ տեղի ունեցող վերջին զարգացումներին՝ ասել է «Կովկաս» ինստիտուտի փոխտնօրեն, քաղաքագետ Սերգեյ Մինասյանը։

Նրա խոսքերով՝ ԱՄՆ–ի, Ռուսաստանի և Եվրամիության համար մի կարևոր հանգամանք կա, այն է՝ ոչ ոք չի ուզում պատերազմի վերսկսում, և այն իրավիճակը, որը մենք տեսնում ենք, դրա արտացոլումն է։

«Եթե նույնիսկ մոտ ժամանակներս որևէ փաստաթուղթ ստորագրվի, դա կնշանակի միմիայն երկու բան՝ առաջին՝ գերտերությունները կխուսափեն հակամարտության գոտում նոր լարվածությունից, և երկրորդ՝ ստորագրումից հետո կսկսվի նոր փուլ, որը կարող է տասնամյակներ տևել»,–տեսակետ է հայտնել քաղաքագետը։

Ըստ բանախոսի՝ Ռուսաստանի նախագահի համար այս հանդիպումների շարքը դարձել է անձնական գործ, իսկ այս ձախողումները բավական բացասական կերպով են անդրադառնում Մեդվեդևի իմիջի վրա։

«Հասկանալի է, որ Ռուսաստանը փորձելու է Կազանի հանդիպման ժամանակ եղած առաջարկությունները փոքր փոփոխությունների ենթարկել, բայց ոչ ավելին։ Իմաստը մնալու է նույնը»,–ասել է Ս. Մինասյանն ու հավելել, որ այդ սկզբունքներում տեղ կգտնի նաև հանրաքվեի մասին կետը։

7or.am