Սփյուռքահայ ուսանողները, ովքեր կրթություն են ստացել Հայաստանի բուհերում պետպատվերի շրջանակներում, տուգանվելու են, եթե հրաժարվեն առնվազն երկու տարի աշխատել իրենց բնակության վայրում։ Այս մասին Կրթության ազգային ինստիտուտում հայտարարել է Հայաստանի կրթության և գիտության նախարար Արմեն Աշոտյանը։

«Ամեն տարի պետությունը պետպատվերի շրջանակներում 70 անվճար տեղ է հատկացնում սփյուռքի ուսանողներին, սակայն խնդիր է ծագում, երբ ուսումն ավարտելուց հետո շրջանավարտները չեն աշխատում իրենց բնակության վայրում։ Հետևաբար, մեր բոլոր ջանքերը և միջոցները, որոնք մենք ծախսել ենք այդ ուսանողների վրա, որպեսզի նրանք փոխարինեն սփյուռքի ուսուցիչներին, ապարդյուն են»,- ասել է Աշոտյանը։

Նախարարը հայտարարել է, որ ուսանողների պայմանագրերում ներառվելու է կետ, համաձայն որի, եթե շրջանավարտները հրաժարվեն վերադառնալ իրենց բնակության երկիր և չաշխատեն այնտեղ երկու տարի, կտուգանվեն ավարտական կուրսի ութնապատիկ գումարի չափով: Նրա խոսքով, այսպիսով, կանոնները խախտած ուսանողները կհատուցեն կառավարությանը պատճառած «վնասը»: