Առաջիկա շաբաթների ընթացքում պաշտոնական Բրյուսելը Հարավային Կովկաս կուղարկի իր նոր հատուկ ներկայացուցչին, որի հիմնական առաքելություններից մեկը կլինի նպաստել տարածաշրջանի հակամարտությունների, այդ թվում՝ ղարաբաղյան խնդրի կարգավորմանը: Այդ մասին հայտարարել է Եվրամիության արտգործնախարարության` Արևելյան հարևանության ծրագրի գործադիր տնօրեն Միրոսլավ Լայչակը:

Լայչակն ընդգծել է, որ Եվրամիությունն ուզում է մեծացնել իր դերակատարությունը հակամարտության կարգավորման գործընթացում, սակայն ո՛չ ԵԱՀԿ Մինսկի խմբի հաշվին:

–Եվրամիությունն աջակցում է Մինսկի խմբին։ Սակայն, միևնույն ժամանակ, Եվրամիության անդամ երկրների շարքում այժմ աճող համոզմունք կա, որ պաշտոնական Բրյուսելը նույնպես պետք է ակտիվ և տեսանելի քաղաքական դերակատարություն ունենա: Ղարաբաղյան խնդիրը մեր հարևանությամբ միակ հարցն է, որի կարգավորմանը Եվրամիությունն ուղղակիորեն ներգրավված չէ: Մենք չենք կարող հարաբերություններ ունենալ մեր արևելյան հարևանների հետ և ձևացնել, որ այդ հարցը գոյություն չունի»,–ասել է Լայչակը: