«Համագործակցություն հանուն ժողովրդավարության» կենտրոնի նախագահ Ստեփան Դանիելյանը կարծում է, որ Հայ ազգային կոնգրեսի հետ երկխոսության մասին իշխանության ներկայացուցիչների կողմից կլինեն իրարամերժ հայտարարություններ, որոնք հնարավորություն կտան գործող իշխանությանը ժամանակ շահել:

–Այնուամենայնիվ, կարծում եմ, որ բանակցությունների նման մի բան տեղի կունենա: Դա մյուս տարվա խորհրդարանական ընտրությունների սցենարի կարևոր բաղադրիչներից մեկը կարող է լինել։ Խոսքը հերթակա՛ն ընտրությունների մասին է: Արտահերթ ընտրությունների մասին խոսելը լուրջ չէ։ Դա կարող է տեղի ունենալ Ղարաբաղի խնդրի բանակցությունների կոնտեքստում միայն: Այժմ նման պատճառ չկա: Արտահերթ ընտրությունների մասին ՀԱԿ-ի պահանջը քարոզչական նշանակություն ունի,–«7օր»–ին ասել է Ստեփան Դանիելյանը։

Ինչ վերաբերում է ՀԱԿ–ի մասին ՀՀԿ խմբակցության ղեկավար Գալուստ Սահակյանի՝ երեկ հնչեցրած արտահայտություններին, Ս. Դանիելյանը նկատել է.

–Իշխանության շրջապատում միմյանց նկամամբ վերաբերմունքն ավելի բացասական է, քան իրենցից դուրս գտնվողների նկատմամբ։

7or.am