2011թ. հուլիսի 1–ից Երևանի քաղաքապետ Կարեն Կարապետյանի որոշմամբ մետրոյի սակագինը կրկնակի բարձրացել է՝ դառնալով 100 դրամ։ Այս որոշումը բնակիչների շրջանում դժգոհության ալիք է բարձրացրել։ Անդրադառնալով դրանց՝ Կարեն Կարապետյանը «Facebook»-ի իր էջում գրել էր.

«Ես բազմիցս նշել եմ, որ մենք ընդհանրապես բավականություն չենք ստանում, երբ մեր քաղաքացիներին առաջարկում ենք ավելի բարդ պայմաններ: Մետրոյի սակագնի բարձրացման պատճառ է հանդիսացել ժամանակին կառավարության կողմից ստանձնած վարկային պարտավորությունը: Մետրոյին ուղղված դոտացիան չի նվազել, սակայն մետրոն չկորցնելու և տեխնածին վթարներից խուսափելու համար պահանջվում են ծախսեր, որի հնարավորությունը հանրապետական բյուջեն չունի: Ստանձնած վարկային պարտավորությունով է պայմանավորված սակագնի բարձրացումը»։

Նշենք նաև, որ երեկ Երևանի քաղաքապետարանի առջև բողոքի գործողություն է տեղի ունեցել «Ո՛չ մետրոյի թանկացմանը» նախաձեռնության անդամների մասնակցությամբ։ Նրանք նամակ են հանձնել Երևանի քաղաքապետին, որին քաղաքապետարանը պարտավորվել է պատասխանել 30 օրվա ընթացքում։ Մինչ այդ նամակներ են հանձվել նաև ՀՀ նախագահին և ՀՀ վարչապետին։

7or.am