Լրագրողների  հետ  հանդիպման ժամանակ անդրադառնալով Հայաստանում առկա արտագաղթի խնդրին՝ տնտեսագետ, «Այլընտրանք» հետազոտական կենտրոնի ղեկավար Թաթուլ Մանասերյանն ասել է, որ այսօր երկրից ոչ միայն արտագաղթում է բնակչության աշխատունակ հատվածը, այլև արտահոսում է ազգային կապիտալը:

–Տեսե՛ք, մեր  պետությունը գումարներ է ծախսում՝ կրթություն ապահովելով, իսկ հետո մենք նվեր ենք տալիս այլ պետություններին մեր որակյալ մասնագետներին,–ընդգծել է նա:

Ըստ Թաթուլ Մանասերյանի՝ արտահոսում է նաև  մեծահարուստների  կապիտալը, քանի որ մարդիկ նախընտրում են սպասարկման ոլորտը, ոչ ոք արտադրությանը ուշադրություն չի  դարձնում, և այստեղ գործադիր  իշխանությունն անելիք ունի։

–Տեղի  է ունենում մի շատ վտանգավոր երևույթ, որի անունն է ժողովրդագրական սպառնալիք  կամ բնակչության ծերացում։ Եթե Արևմուտքում սա տեղի է ունենում ի հաշիվ սոցիալական պայմանների լավացման, մեզ մոտ պարզապես մեխանիկորեն՝ արտագաղթի  պատճառով է լինում։ Ի՞նչ է ստացվում՝ ծերացման հետևանքով ավելի փոքր թվով մարդկանց ուսերին՝ աշխատունակ, երիտասարդ բնակչության, ծանրանում է կենսաթոշակներ, սոցիալական նպաստներ ապահովելու հարկային բեռը։ Դա նշանակում է, որ հարկերը գնալով պետք է բարձրացնել, որպեսզի բնակչության սոցիալական կարիքները հոգան, սա ակնհայտ է, բայց որն էլ կտանի երկրին ֆինանսական դեֆոլտի։ Շատ լավ տեսնում եք, որ պետական պարտք–ՀՆԱ հարաբերակցությունն արդեն վտանգավոր սահմանի է հասել, այսինքն՝ ՀՆԱ–ի գրեթե կեսը պետք է տանք պարտքը սպասարկելու համար: Բայց սրանից ավելի վտանգավորն այն է, որ վերջին տարիներին ձեռք բերված գումարներն այդպես էլ չմտան արտադրություն, որպեսզի արդյունք ստեղծվի, և կառավարվի արտաքին պարտքը,–ասել է նա։

7or.am