ՀԱԿ արտաքին հարաբերությունների հանձնաժողովի անդամ Վլադիմիր Կարապետյանը, լրագրողների հետ հանդիպման ժամանակ անդրադառնալով Կազանում կայացած  Սարգսյան–Ալիև–Մեդվեդև  հանդիպմանը, ասել է, թե այն  ցույց է տալիս, որ ղարաբաղյան կարգավորման  գործընթացն ավարտված չէ։

–Կողմերից մեկը՝ հայկական կողմը,  բազմիցս հայտարարել է, որ պատրաստ է ստորագրել այդ փաստաթուղթը: Ուզում եմ ձեզ հիշեցնել Սերժ Սարգսյանի հայտարարությունն առ այն, որ եթե Ադրբեջանն ինչ–որ նորանոր առաջարկություններով հանդես չգա, ապա կարելի է գրանցել առաջընթաց։ Նա որևէ խոսք չասաց, որ մենք ունենք առաջարկություններ, չնայած ասաց, որ փաստաթուղթը մեր երազած փաստաթուղթը չէ՝ թերևս դրանով ուղերձ տալով միջազգային հանրությանը և հասարակությանը, որ պատրաստ է ստորագրել փաստաթուղթը,–ընդգծել է նա։

Ըստ Վլադիմիր  Կարապետյանի՝ մեր  երկիրը այսօր էլ  պատրաստակամությունն է  հայտնում  ստորագրել սեղանի վրա դրված փաստաթուղթը, ինչը վկայում է, որ գործընթացը շարունակվում է, և առաջիկայում պետք է սպասել արգացումների։

Իսկ թե ի՞նչ  զարգացումների մասին է խոսքը՝ նա նշել  է, թե քանի որ  փաստաթուղթը չի ստորագրվել հենց Ադրբեջանի պատճառով, որովհետև  նա 10 առաջարկություն է ներկայացրել փաստաթղթի վերաբերյալ, ապա առաջիկայաում համախագահներն  այդ առաջարկություններով կգան Հայաստան և կփորձեն համաձայնեցնել, թե դրանցից Հայաստանը որը կընդունի, իսկ որը՝ ոչ։

–Իմ կարծիքով՝ արտգործնախարարի համար պետք է պատիվ լիներ` խոսել իր նախագահի մասին և ասեր. «Քանի որ սեղանին մեր երազած փաստաթուղթը չէ, մենք ներկայացրեցինք մեկ, երկու կամ հինգ առաջարկություն, մենք ուզում ենք բարելավել, ավելի լավ փաստաթուղթ անել»։ Բայց մենք  ոչ մի առաջարկություն չներկայացրեցինք, և դա մեր ձախողումն էր։ Երկրորդ, ես կասեի՝ ավելի լուրջ ձախողումը մեր պատվիրակության նրանում է, որ մենք տեղում չֆիքսեցինք Արդբեջանի ապակառուցողական կեցվածքը, այսինքն՝ եթե կա պայմանավորվածություն դրույթների վերաբերյալ, համաձայնեցված են որոշակի դրույթներ, և Ադրբեջանը դուրս է գալիս այդ պայմանավորվածությունից, անմիջապես միջնորդների ներկայությամբ պետք է մատնանշեր, ֆիքսեր այդ հանգամանքը և հասներ այն բանին, որ միջնորդները խոսեին Ադրբեջանի ապակառուցողական դիրքորոշման մասին, այլ ոչ թե միայն մենք անենք հայտարարություն։ Իսկ մի քանի օր հետո միջազգային հանրությունը հավասար դիրքերից է նայելու թե՛ Հայաստանի, թե՛ Ադրբեջանի կեցվածքին՝ բանակցությունների ժամանակ, և կողմերից մեկին չի մեղադրելու հանդիպումը ձախողելու համար,–ասել է նա։

7or.am