–Գյումրու տեխնոպարկի մասին Ձեզ լավ լուրեր եմ խոսք տալիս մինչև տարվա վերջ, երբ արդեն գործնական աշխատանքները տեսանելի կլինեն,– հունիսի 24–ին լրագրողների հետ հանդիպման ժամանակ ասել է ՀՀ էկոնոմիկայի նախարար Տիգրան Դավթյանը։

Ներկայացնելով տնտեսական իրավիճակը՝ նախարարն ասել է, որ արդյունաբերության ոլորտում ոգևորիչ ցուցանիշներ են արձանագրվել, և արդյունաբերությունն այս տարի լինելու է ՀՀ տնտեսության շարժիչ ուժը։

–Նախորդ տարվա մայիս ամսվա համեմատ արդյունաբերության ոլորտում գրանցվել է 25% աճ,– նշել է նա։

Այս տարվա ընթացքում, նրա խոսքերով, կլինեն նոր ձեռնարկություններ, իսկ այս 5–6 ամիսների ընթացքում արդեն մոտ մեկ տասնյակ ձեռնարկություն է բացվել։ Նա նաև ընդգծել է, որ վերջին շրջանում կառավարությունը նախատեսել է հարկային արտոնությունների փաթեթ, որը հասանելի է բոլոր ընկերություններին։ Արդեն ցուցաբերվել է շուրջ 72 մլրդ դրամի աջակցություն։

–Իմ կարծիքով ակնհայտ է, որ մենք այս տարի պետական բյուջեով նախատեսված 4,6% տնտեսական աճն առնվազն կունենանք, և կարծում եմ՝ կունենանք անգամ մի քիչ ավելի շատ։ Ինչ վերաբերում է սղաճի ցուցանիշներին, համոզված եմ, որ սղաճի մակարդակը կնվազի մինչև տարվա վերջ. դրա համար բոլոր հիմքերը կան,– ասել է նախարարը։

«Դուք նշում եք, որ նոր ձեռնարկություններ են բացվում, և բացվելու են, սակայն երկրի հիմնական գործարաններից մեկը՝ «Նաիրիտը», փակվում է։ Սա՞ ինչպես կմեկնաբանեք» «7օր»–ի հարցին ի պատասխան՝ Տիգրան Դավթյանն ասել է.

–Գիտեք, որ կառավարությունը հիմա անմիջականորեն և բավական լուրջ զբաղվում է «Նաիրիտի» ծրագրով, և առաջիկայում էական քայլեր կարվեն այդ ուղղությամբ։

Ինչ վերաբերում է ներդրումային ծրագրով հետաքրքրվողներին, նա նշել է, որ այդ հարցին կպատասխանի Էներգետիկայի նախարարությունը։

7or.am