Արդեն իսկ կառավարության նախանշած թիրախի տեսանկյունից կա էական հետընթաց, որովհետև իշխանությունը Նիկոլ Փաշինյանի գլխավորությամբ որոշ ժամանակ առաջ նախորդ ծրագրով մինչև 2030 թվականը խոստանում էր երկնիշին մոտ տնտեսական աճ` 15 անգամ մեծացնելով ՀՆԱ-ն, բայց հիմա արդեն փաստացի կրճատել է իր թիրախը, Sputnik Արմենիայի հետ զրույցի ընթացքում նման կարծիք հայտնեց տնտեսագետ Թադևոս Ավետիսյանը։

«Տնտեսական աճ խոստացողն առնվազն պետք է տեսնի, թե ինքն ինչ է արել անցած երեք ու կես տարիների ընթացքում։ Նա պարզապես հյուծել է տնտեսությունը, կարևորագույն տնտեսական ուղղություններից մեկը` ներդրումային ուղղությունը բացարձակապես ձախողված է, որովհետև երկրից շարունակվում է կապիտալի արտահոսքը, և 2020 թվականին ունեցել ենք 7,6 տոկոս տնտեսական անկում։ Համաշխարհային տնտեսությունն այժմ գրանցում է իրական աճ, մինչդեռ մեր երկրի տնտեսությունն ընթացիկ տարվա առաջին կիսամյակի տվյալներով ունեցել է ընդամենը 5 տոկոս անվանական աճ այն դեպքում, երբ միջին գնաճը կազմել է 6 տոկոս, այսինքն` իրական ծավալները շարունակում են նվազել»,-նշեց տնտեսագետը։

Ավետիսյանը հիշեցրեց նախկինում կառավարության տված մի քանի խոստումները, որոնք այդպես էլ չիրականացան։ Խոսքը վերաբերում է տնտեսական հեղափոխությանը, ծայրահեղ աղքատության վերացմանը, տնտեսությունն առաջանցիկ ներդրումներով ապահովելուն, մինչդեռ շարունակվող մտահոգիչ ցուցանիշը` գնաճը, ավելի է մեծանում, իսկ մարդկանց եկամուտները խիստ դանդաղ տեմպերով են ավելանում, նույնիսկ պաշտոնական թվերով միջին աշխատավարձն ընթացիկ տարվա յոթ ամիսներին աճել է ընդամենը 5,4 տոկոսով, բայց միաժամանակ սննդամթերիքի գներն աճել են ավելի քան երեք անգամ։

Ավետիսյանի համոզմամբ` Հայաստանն ընդհանուր առմամբ ունի ավելի բարձր տնտեսական աճի ներուժ, քան նշում է վարչապետը, սակայն կա առաջնային և կարևոր մի պայման, որպեսզի երկիրը ղեկավարեն ոչ թե պոպուլիզմով ու նեղ անձնական քաղաքական շահերով, ստով ու կեղծիքով առաջնորդվող անձինք, այլ իրապես ազգային շահերով տոգորված քաղաքական ուժերը։