Լրագրողների հետ  հանդիպման ժամանակ  Հայաստանի մարքսիստական կուսակցության ղեկավար  Դավիթ Հակոբյանը, անդրադառնալով ղարաբաղյան հիմնախնդրին, ասել է, որ պատմությունն իր ժողովրդի առաջ դրել է արցախյան հիմնահարցի լուծման չորս տարբերակ:

–Կրկնում եմ արցախյան ֆորումում նախագահ Սարգսյանի խոսքերը. «Մեզ անհրաժեշտ է Լեռնային Ղարաբաղը ցամաքային կապով Հայաստանի հետ»:–Ես հարցնում եմ նրան՝ ի՞նչ է նշանակում ցամաքային կապ՝ մեկ շրջա՞ն, մեկ կիլոմե՞տր, մեկ էշի կածա՞ն...անհայտ է: Որպես ի՞նչ եք միացնում ինքնորոշման դրոշի տակ։ Արցախյան հիմնահարցը՝ որպես հայկական հարցի բաղկացուցիչ մաս։ Որպես մա՞րզ...իսկ արցախցին համաձա՞յն է ձեր մարզը դառնալ: Չկա Արցախի տեսակետ, իսկ տարբերակը՝ փոխզիջում: Սա պաշտոնական Երևանի տեսակետն է,–ասել է նա:

Երկրորդ ածանցյալ տեսակետն, ըստ Դավիթ Հակոբյանի, պաշտոնական Բաքվի տեսակետն է, իսկ երրորդը՝ անգլո-սաքսոնականը կամ թուրք-ամերիկյանը, որն, ըստ մադրիդյան սկզբունքների, ենթադրում է ազատագրված հողերի փուլ առ փուլ հանձնում թուրքերին, խաղաղապահ ուժերի տեղադրում և ադրբեջանցիների վերադարձ։

–Չորրորդ տարբերակը պաշտոնական Ստեփանակերտի տեսակետն է: Սա իր Սահմանադրությամբ միջազգային իրավունքի քաղաքական սուբյեկտ է՝ Սահմանադրության մեջ 13-15 հազ ք/կմ պատմաաշխարհագրական տարածքով: Արցախը մնացել է բանակցային գործընթացից դուրս: Փաստորեն, պաշտոնական Երևանն Արցախին պահում է որպես դիվանագիտական պատանդ իր քաղաքական շահատակությունների համար,–ասել է նա:

Դավիթ Հակոբյանի խոսքերով՝ այսօր եկել է սկզբունքորեն նոր՝ հինգերորդ տարբերակի ժամանակը, որն առաջարկում է Մարքսիստական կուսակցությունը։ Նա նշել է, որ հաճախ ՀՀՇ-ական լրագրողները նկատողություն են անում իրեն, թե ինչպե՞ս է ոտք մեկնում Հալեպցի Լևոնի հետ՝ նոր տարբերակ առաջարկելով։

–Հարցն անասնական գլխաքանակը չէ, որ հավաքում է, այլ նրա քաղաքական միտքը, ու կարևոր չէ, թե այդ միտքը հնչում է այնտեղ՝ Մատենադարանո՞ւմ, թե՞ այստեղ՝ մամուլի ակումբում: Կուսակցության խնդիրը ոչ թե իշխանությունը զավթելն է, այլ քաղաքագիտական միտքը: Այսպես թե այնպես, մենք առաջարկում ենք քննարկման դնել հինգերորդ տարբերակը՝ արցախյան խնդրի կարգավորման մե՛ր տարբերակը։ Այն հետևյալն է՝ Հայաստանը սեպարատ կարգով դուրս է գալիս բանակցային գործընթացից ու իր տեղը՝ որպես գլխավոր դերակատար, զիջում Արցախին: Ոչ թե շիթիլ է նրան անում իր հետ, այլ դուրս է գալիս ու իր տեղը զիջում Արցախին,–ասել է նա։

Դավիթ Հակոբյանը նաև նշել է, որ հունիսի 25–ին կայանալիք Սերժ Սարգսյան, Դմիտրի Մեդվեդև և Իլհամ Ալիև հանդիպումից ակնկալիք չունի։

–Նույն «բալտավնյան» է,–ասել է նա։