Հռոմի պապ Ֆրանցիսկոսը նախօրեին Վատիկանում ամենշաբաթյա ընդունելության ժամանակ հանդիպել է «Սարդ մարդուն», գրում է Reuters-ը։

Ավելի ուշ պարզվել է՝ Marvel-ի սուպերհերոսի կոստյումը կրել է 27-ամյա Մատիա Վիլյարդիտան, որը մանկական հիվանդանոցներում աշխատանքի համար անցյալ տարի Իտալիայի նախագահ Սերջիո Մատարելայի կողմից պարգևատրվել էր։

«Ես «Սարդ մարդու» կոստյում եմ հագնում, որպեսզի ժպիտ պարգևեմ փոքրիկ հիվանդներին»,-իտալական թերթերից մեկին հայտնել է Վիլյարդիտան։

Նրա խոսքով՝ նախօրեին ունկնդրել է Հռոմի պապի ուղերձը, ապա ողջունել է նրան՝ փոխանցելով սուպերհերոսի դիմակը։

«Իսկական սուպերհերոսները տառապող երեխաներն ու նրանց մտերիմներն են»,-հավելել է իտալացին։

Նշվում է, որ իտալացին մանկական հիվանդանոցներում բուժվող երեխաներին ժպիտներ է պարգևում արդեն 4 տարի։ Նա նույնպես բնածին հիվանդություն ունի և 19 տարի շարունակ բուժումներ է ստացել տարբեր հիվանդանոցներում։

«Երբ մենակ պառկած էի հիվանդասենյակում, շատ էի ցանկանում, որ «Սարդ մարդը» պատուհանից ինձ հյուր գա»,-մի առիթով ասել է երիտասարդը։

Աղբյուրը՝ tert.am