«Լրացել է Հայաստանի Ազգային գրադարանի տնօրեն պրն. Դավիթ Սարգսյանի և ՀՀ մշակույթի նախարարության միջև 2006թ. կնքված աշխատանքային պայմանագրի գործողության ժամկետը և սույն թվականի հունիսի 3-ի ծանուցմամբ տեղեկացվել է, որ «հունիսի 16-ից աշխատանքային պայմանագիրը համարվում է լուծված»: Վերջին տասնամյակում, բացառապես Դ. Սարգսյանի նախաձեռնությունների, գրադարանային գործում ցուցաբերած ընդգծված տաղանդի, ինչու չէ, նաև անձնական կապերի շնորհիվ է, որ Հայաստանի Ազգային գրադարանը դարձել է պետական-մշակութային քաղաքականություն իրականացնող, մշակութային ակտիվ կյանքով ապրող եզակի հաստատություններից մեկը, որը վստահելի գործընկեր է Հայաստանում և արտերկրում: Բոլորին է հայտնի, որ Դավիթ Սարգսյանը որպես Ազգային գրադարանի տնօրեն, գրող ու հրապարակախոս, հայ մարդ մեծ հեղինակություն և հարգանք է վայելում ինչպես մեր, այնպես էլ այլ երկրների հայ մտավորականության շրջանում: Նրա տքնաջան հետևողականության, գրի ու գիտության նկատմամբ նախանձախնդիր վերաբերմունքի հետևանքն է, որ Ազգային գրադարանը դարձել է մեր մտավորականության և երիտասարդության ամենասիրելի վայրերից մեկը: Ակնառու են Դ.Սարգսյանի եռանդուն ջանքերը աշխատակազմի բարոյահոգեբանական մթնոլորտի առողջացման և գրադարանի առաջընթացի գործում: Ահա նրա աշխատանքի մի քանի պերճախոս արդյունքները. արտասահմանյան երկրների հետ ամուր փոխգործակցային կապեր, հրատարակված նորանոր գրքեր, պարբերաբար իրականացվող գիտամշակութային զանազան միջոցառումներ ու տեխնիկական նոր միջոցներ, թվայնացման կենտրոն, նոր բնույթի ընթերցասրահներ` նախատեսված տեսողական խնդիրներ ունեցողների, իրավագետների և այլոց համար: Հայաստանի Ազգային գրադարանը` ի դեմս տնօրեն Դ. Սար¬գսյանի, նախապատրաստական մեծ աշխատանքներ է կատարել և կատարում է 2012թ. «Հայկական գրատպության 500-ամյակը» և «Երևանը գրքի համաշխարհային մայրաքաղաք» իրա-դարձությունները բովանդակալից և բազմաբնույթ անցկացման գործում: Ավելի քան համոզված ենք, որ Դ. Սարգսյանի բացակայությունից հիմնավորապես կտուժի ոչ միայն Ազգային գրադարանը, այլև գրադարանային, մշակութային դաշտը: Խնդրում ենք Ձեզ, հնարավորություն տրվի Դավիթ Սարգսյանին` շարունակելու իր աշխատանքը Ազգային գրադարանի տնօրենի պաշտոնում` ի շահ գրադարանի և մշակութային ոլորտի: Կարծում ենք մեր դիմում-խնդրանքը հաշվի կառնվի և Հայաստանի Ազգային գրադարանի կոլեկտիվը երախտապարտ կլինի Ձեզ»։