Լրագրողների հետ այսօր հանդիպել են ԱԺ ՀՀԿ խմբակցության պատգամավոր, ՀՀԿ խորհրդի անդամ Արտակ Զաքարյանը և ԱԺ ՀՅԴ խմբակցության պատգամավոր Արծվիկ Մինասյանը։

–Թե՛ իշխանությունների, թե՛ ՀԱԿ–ի՝ ղարաբաղյան հիմնահարցի վերաբերյալ հայեցակարգերը կառուցվում են զիջելու սկզբունքի վրա,–ասել է Ա. Մինասյանն ու ավելացրել, որ սա ՀԱԿ–ի կողմից դրսևորվում է որպես ռազմավարական նպատակ։

«Այս հարցի մասին բարձրաձայնելը Լևոն Տեր–Պետրոսյանը չի էլ թաքցնում։ Նա շարունակում  է 1998–ի այն վարքագիծը, որը մերժվեց հայ հասարակության կողմից»,–նկատել է բանախոսը։

Նրա խոսքերով՝ իշխանությունը ևս չի ժխտում այս մոտեցումը, ուղղակի փորձում է նվազագույն զիջումների միջոցով լուծել խնդիրը։

–Սակայն այն հանգամանքը, որ երկու կողմերի դիքորոշումն էլ զիջումների վրա է հենված, լուրջ մարտահրավեր է բոլորիս համար,–նշել է նա։

Ըստ Ա. Մինասյանի՝ ՀԱԿ–ի խնդիրներից է ղարաբաղյան հարցում իշխանություններին զիջման քաղաքականություն պարտադրելը և իշխանության այն գործողությունները խրախուսելը, որոնք տանելու են զիջումների։

ՀՅԴ պատգամավորի համոզմամբ՝ Լևոն Տեր–Պետրոսյանը հայ–թուրքական հարաբերությունների հարցում էլ է պատրաստ իր ամբողջ զինանոցը գործադրել զիջումների համար, այդ թվում՝  դրսից տղա բերելու մոտեցումը։

7or.am