Եմենի կառավարական զորքերը պատրաստվում են գրոհել երկրի հարավում գտնվող Զինջիբար քաղաքը, որը գրավել է «Ալ–Քայիդա» ահաբեկչական խմբավորումը։ «Ֆրանս Պրես» գործակալությունը, հղում անելով Եմենի զինված ուժերի աղբյուրներին, փոխանցում է, որ քաղաքի արվարձաններում տեղի ունեցած բախումների հետևանքով զոհվել է երեք զինվորական։

Ավելի վաղ հաղորդվում էր, թե երեքշաբթի՝ կառավարական զորքերի կողմից Զինջիբար քաղաքի նախորդ գրոհի ժամանակ, զոհվել էր ինը զինվորական և ոչնչացվել վեց գրոհային։ «ՌԻԱ նովոստի»–ն գրում է, թե Եմենի պաշտպանության նախարարության տվյալներով՝ նույն օրը հատուկ գործողության ժամանակ այդ քաղաքում հաջողվել է ոչնչացնել «Ալ–Քայիդայի» 30 գրոհայինի։

Եմենում հակակառավարական ցույցերը սկսվել են փետրվարի սկզբից ու շարունակվում են մինչ օրս։ Արևմտյան ԶԼՄ–ների տվյալների համաձայն՝ ժողովրդական հուզումների ընթացքում զոհվել է մի քանի հարյուր մարդ։