103 տարի անց, այս օրերին, արդեն Երրորդ Հանրապետությունը ապրում է իր 30-ամյա պատմության թերևս ամենածանր ժամանակներից մեկը։ Թշնամին համարյա անարգել ներխուժել է մեր երկրի տարածք, Կառավարությունը փաստացի կազմալուծված է, Նախագահը ձևական մարմին է դարձել, բանակի ղեկավարությունը գլխատված է իր հոգևարքն ապրող իշխանության կողմից։ Մենք գտնվում ենք լայնածավալ արտաքին ագրեսիայի վտանգի առաջ, որը կարող է հանգեցնել անկախ պետության լիակատար կազմալուծման, ինչպես դա եղավ սրանից 100 տարի առաջ։

Ի տարբերություն 100 տարի առաջվա սակայն, երբ մենք սպառել էինք մեր ուժերը, և դադարեցրեցինք դիմադրությունը, այսօր մենք հնարավորություն ունենք շրջելու պատմության ընթացքը, և փրկելու մեր պետությունը։ Սա պահանջում է համակարգված գործողություններ, որոնց այսօր պետք է ներգրավվեն մեր պետության ճակատագրով շահագրգիռ բոլոր անձիք և կազմակերպությունները՝

Ա) ՀՀ Սահմանադրության Հոդված 14-ը սահմանում է, որ ՀՀ զինված ուժերն ապահովում են երկրի պաշտպանությունը, անվտանգությունը, տարածքային ամբողջականությունը և սահմանների անձեռնմխելիությունը: Այսօր Զինված ուժերը պետք է առաջնորդվեն միայն Սահմանադրությամբ, և սկսեն իրականացնել երկրի սահմանների պաշտպանության իրենց ուղիղ սահմանադրական առաքելությունը՝ անհրաժեշտության դեպքում հրաժարվելով ենթարկվել վարչապետի ժամանակավոր պաշտոնակարից եկող ապօրինի հրահանգներին, որն իր հրաժարականից հետո այլևս իրավասու չի ուղղորդել Զինված ուժերին, առավել ևս կաշկանդել նրանց օրինական գործողությունները։

Բ) Իր անմիջական առաքելությունը իրականացնելու նպատակով, բանակը նաև պետք է պահեստազորի մասնակի զորահավաք սկսի առնվազն այն մարզերում, որոնց անվտանգությանն այսօր անմիջականորեն սպառնում է թշնամին՝ Սյունիք, Գեղարքունիք, Վայոց Ձոր, Տավուշ և Արարատ։ Պետք է զենքի տակ կանգնեցնել առավել մարտունակ բնակչությանը, և ապահովել բավարար մարտական ռեզերվ՝ սահմանների պաշտպանության, և տարբեր հատվածներում առաջացած թշնամուն դիմակայելու և հետ մղելու համար։

Գ) Մեր բանակի ակտիվությունը և նախաձեռնողական գործողությունները մեծ հավանականությամբ կստիպեն տարածաշրջանի այլ տերություններին արձագանքնել և միջամտել՝ կանխելու նոր լայնամասշտաբ պատերազմը։ Ի տարբերություն անցած տարվա պատերազմի, Ադրբեջանը տարածաշրջանում ներգրավված և ոչ մի տերությունից առայժմ որևէ ընդգծված աջակցություն չի ստացել, իսկ իրավիճակի սրումը կբերի նաև նրան, որ նրանք ստիպված կլինեն արդեն ուղիղ միջամտել և հակազդել Ադրբեջանին։

Դ) ՀՀ Սահմանադրական դատարանը պետք է հրատապ կարգով որոշում կայացնի՝ արգելելով վարչապետի ժամանակավոր պաշտոնակատարին Հայաստանի անունից որևէ միջազգային փաստաթուղթ ստորագրել։ ՀՀ Սահմանադրության 132 հոդվածին համաձայն, միայն ՀՀ Նախագահն է լիազորված ՀՀ անունից միջազգային պայմանագրեր ստորագրել, ուստի նա ևս պետք է հետևողական լինի իր սահմանադրական գործառույթները իրականացնելիս, և կտրականապես հրաժարվի ՀՀ սահմաններին վերաբերվող որևէ միջազգային փաստաթուղթ ստորագրել՝ մինչև նոր ընտրությունները, և դրանցով ընտրողների մեծամասնության վստահությունը վայելող լեգիտիմ իշխանության ձևավորումը։

Ե) Մեզ, անհատ քաղաքացիներիս, պետք է ամեն գնով արագ ձևավորել նոր իշխանություն, որը չի կրում իր վրա անցած պատերազմում պարտության խարանը, ընդունակ է հստակ գործողություններով ամրապնդել պետության խարխլված կառույցը, վերականգնել զինված ուժերի կարողությունները, շտկել հարաբերությունները մեր հիմնական ռազմավարական գործընկերների հետ, և կոշտ հակազդել լկտիացած թշնամուն։ Միայն այդպիսի կենտրոնացված իշխանությամբ մենք կարող ենք այսօր փրկել պետությունը, իսկ հետո արդեն կարող ենք նորից մտածել ժողովրդավարական ազատությունների և զարգացման մասին։