Ազգային ժողովի արտահերթ ընտրությունները ենթադրելու են ծախս, որն ավելի է խորացնելու պետական բյուջեի՝ առանց այն էլ ծանր վիճակը, բայց եթե այս իշխանությունները չեն տալիս հրաժարական այն բազմաթիվ պատճառների համար, որ այսօր կան և չեն հեռանում իշխանական աթոռներից, ապա, թերևս, տեսանելի տարբերակներից մեկն ԱԺ արտահերթ ընտրությունների անցկացումն է, որը կարող է դառնալ հնարավորություն՝ այս ապիկարներին իշխանական աթոռներից քշելու համար։ Այս մասին Tert.am-ի հետ զրույցում ասաց ՀՅԴ Բյուրոյի տնտեսական հետազոտությունների գրասենյակի ծրագրերի համակարգող, տնտեսագետ Թադևոս Ավետիսյանը՝ անդրադառնալով արտահերթ ընտրությունների տնտեսական հետևանքներին։

«Այդ գումարը համադրելի չէ այն կորուստների հետ, որ մենք ունենք, մեր երկրից կապիտալ է փախչում, չկան ուղղակի ներդրումներ, մեր երկրի ազգային արժույթն արժեզրկվում է և հատկապես առաջին անհրաժեշտության ապրանքների գնաճն արդեն միջինում 20-25 տոկոս է կազմում։ Այսպիսի պարագայում տնտեսական անկումը, բնականաբար, աճում է, պետական բյուջեի մուտքերն են կրճատվում։ Այն ծախսը, որ ընտրությունների վրա պետք է կատարվի, և այն կորուստները, որ մենք ամեն օր ունենում ենք, անհամադրելի են»,-նշեց նա՝ ընդգծելով նաև, որ ՀՀ-ն ու ժողովրդավարական պետությունը ներկայումս իրար հետ որևէ աղերս չունեն։

«Պետական բյուջեի եկամուտները նվազում են, ծախսերը՝ ավելանում, և դրա միակ պատճառը այսօրվա իշխանական խմբակն է, որն իր ձախողումներով, ապաշնորհությամբ, կասկածելի վարքագծով երկիրը հասցրել է այս վիճակին։ Ես վստահ եմ՝ այսօրվա իշխանությունը որքան ու որ ուղղություններով կարողանա, փորձելու է կեղծել ընտրությունները, վերարտադրվել, որովհետև սեղանին դրված են ՔՕ այնպիսի ենթադրյալ հոդվածներ, որոնք միայն բավարար են, որ ամեն գնով դիմեն կեղծիքների»,-ասաց Ավետիսյանը։

Նա նաև ընդգծեց՝ այնպես չէ, որ այս իշխանությունն ընտրությունների անցկացման դրական փորձ ունի, 2018-ին էլ, ըստ տնտեսագետի, ընտրակաշառքի հստակ դրսևորում էր։

«Լավ իմանալով, որ կեղծում են, ստում են, աջուձախ խոստումներ էին տալիս բոլոր սոցիալական խմբերին, դա ևս ընտրակաշառքի դրսևորում է։ Այս իշխանությունները մեր երկրի գոյության, զարգացման թիվ մեկ սպառնալիքն են, սեղանին դրված է պարզ բան՝ ունենա՞լ հայրենիք, թե՞ չունենալ։ Նրանց մնալու պարագայում հեռու չէ այն օրը, երբ մենք ուղղակի կհայրենազրկվենք և կբնաջնջվենք»,-ասաց նա։

Ըստ Ավետիսյանի՝ եթե չլիներ «Հայրենիքի փրկության շարժման» պայքարը, իշխանությունը որևէ պարագայում չէր որոշի անցկացնել արտահերթ ընտրություններ։

«Իրենց վերջին հույսն է, որ կարողանան վերարտադրվել կամ գոնե ԱԺ-ում ներկայացված լինել։ Ես համոզված եմ, որ դա չի ստացվելու․ ոչ միայն Նիկոլը, այլև «նիկոլիզմը» պետք է անհետ վերանա մեր իրականությունից, քանի որ դրա այլընտրանքը հայրենազրկումն է»,-ասաց Թադևոս Ավետիսյանը։