ԱԺ հայտարարությունների ժամին ՀՅԴ խմբակցության պատգամավոր Լիլիթ Գալստյանն ասել է, թե վերջին շրջանում իշխանությունների կողմից ամենահաճախ օգտագործվող բառը բարեփոխումն է, սակայն այն ձևական բնույթ է կրում։ Ըստ  նրա՝ կառավարությունը բոլոր  ոլորտներում ձախողումների ճանապարհն է ընտրել։

–Տնտեսական ճգնաժամի անվան տակ շարունակ սեփական անզորությունն ու անկարողությունը կառավարության համար հարմար ալիբի է, այնինչ իրական պատճառը օլիգարխիկ կլանային տնտեսությունը, կառավարման անարդյունավետությունն ու անպատժելիությունն են,–ասել է Լիլիթ Գալստյանը։

Ըստ նրա՝ հասարակությունը ծայրահեղ հուսահատված է և երազում է երկրից հեռանալու մասին։

–Արտագաղթ՝ սա է մեր  իշխանություններին տված ժողովրդի գնահատակը։ 2009թ. համեմատած՝ արտագաղթի 20% աճ ունենք։ Արտագաղթողների թիվը  շուտով կհասնի 200 հազ.–ի,–ասել է նա։

Լիլիթ Գալստյանի խոսքերով՝ տարիներ շարունակ խոսվում էր երկխոսության մասին, բայց միայն արտաքին ճնշման ազդեցության տակ է այն ուրվագծվում։

–Ավաղ, քաղաքական երկխոսության շրջանակները  նեղացվել են իշխանություն–ՀԱԿ ձևաչափով՝ մոռանալով, որ երկխոսությունը նախ և առաջ սեփական ժողովրդի և նրան ներկայացնող բոլոր քաղաքական ուժերի հետ պետք է ծավալել։ Երկխոսություն, որի առանցքում պետության և երկրի հեռանկարն է և ամենակարևորը՝ միջին թվաբանական հայը, որն այսօր աներևակայելի  նվաստացումների ճանապարհ է անցնում իր գոյությունն ապահովելու համար,–ասել է նա։

7or.am