Իրանի Սահմանադրության պահապանների խորհուրդը հայտարարել է, որ նախագահ Մահմուդ Ահմադինեջադի՝ ինքն իրեն Նավթային արդյունաբերության նախարարության ժամանակավոր ղեկավար նշանակելու մասին որոշումն անօրինական է։

Այս մասին հաղորդել է «Los Angeles Times»–ը՝ հղում անելով իրանական «FARS» գործակալությանը։

Թերթը գրում է, որ Սահմանադրության պահապանների խորհուրդն Ահմադինեջադի  գործողությունների մեջ Սահմանադրության 135–րդ հոդվածի (սահմանում է նախարարների հրաժարականի ընթացակարգը) խախտում է արձանագրել։ Ավելի մանրամասն տեղեկատվություն չի հաղորդվում։

Նշենք, որ Մահմուդ Ահմադինեջադն աշխատանքից ազատել է նախարար Սայիդ Մասուդ Միր Կազեմին և իրեն նավթային արդյունաբերության նախարար հայտարարել մայիսի 16–ին։

Մինչ այդ հաղորդվում էր Նավթային արդյունաբերության և Էներգետիկայի նախարարությունների ձուլման 5–ամյա ծրագրի մասին, որը մասնավորապես նախատեսում էր  նախարարական պորտֆելների կրճատում։